Incidenti me Osmanin, Tahiri: S’duhet të habitemi, pushteti i ri në RMV s’është miqësor me Kosovën

Partia Demokratike e Kosovës nuk ka informata të mjaftueshme për incidentin që ngjau të premten në Maqedoninë e Veriut, gjegjësisht në Aeroportin Ndërkombëtar të Shkupit ku i përshirë ishte edhe presidentja e Kosovës, Vjosa Osmani, andaj ata presin sqarime zyrtare për atë se çfarë ka ndodhur dje saktësisht.

“Ambasada e Kosovës në RMV duhet të jap sqarime se për çfarë bëhet fjalë saktësisht, për çfarë incidenti bëhet fjalë”, tha shefi i grupit parlamentar të PDK-së, Abelard Tahiri, në një konferencë për media, kur u pyet për këtë çështje.

Ndonëse për Tahirin situata nuk është e qartë plotësisht, sipas tij, nuk duhet habitur me faktin se pushteti i ri në Maqedoninë e Veriut ka një qasje më ndryshe në raport me Kosovën sesa qeveritë e kaluara.

“Nuk më habit fakti, pasi që atje kemi një ndryshim pushteti, i cili përcjellët edhe me ndryshimin e qasjes edhe ndaj shqiptarëve. Ndryshimit të këtij pushteti i ka kontribuar jashtëzakonisht shumë edhe qeveria jonë edhe kryeministri jonë”, tha Tahiri.Në vlerësimin e tij bashkëpunëtorët e kryeministrit të Kosovës, Albin Kurtit, siç i quajti ai, tashmë nuk janë miqësore me Kosovën andaj kjo mund të jetë edhe arsye, sipas tij, pse erdhi deri te incidenti me Osmanin.

“Tashmë shoh që qasja e bashkëpunëtorëve të kryeministrit Kurti në RMV nuk duket të jetë aq miqësore, siç kanë qenë në të kaluarën qeveritë e RMV-së në raport me vendin tonë”.

Bekim Kupina, Këshilltar për Media i Presidentes së Kosovës, Vjosa Osmani, ka thënë se në aeroportin e Shkupit, presidentes, sigurimi i aeroportit ka tentuar që t’ia marrë telefonin personal, gjë që është refuzuar nga Osmani, e cila më pastaj ka hasur në rezistencë nga pala maqedonase.

Ai ka theksuar se përkundër shpjegimit të rregullave qe ekipi i presidentes ia ka bërë të ditur zyrtarit të aeroportit, “sigurimi ka tentuar fizikisht ta shtyjë Presidenten me ç’rast është detyruar që të reagojë Policia e Kosovës për ta hapur rrugën”.

Në anën tjetër TAV, kompania që menaxhon me Aeroportin e Shkupit, ka potencuar se Ministria e Punëve të Brendshme maqedonase i ka udhëzuar që delegacioni i Osmanit t’i nënshtrohet kontrollit standard në aeroport.