Haradinaj i përgjigjet pushtetit: Unë jam në çdo milimetër të Kosovës, ju në cilën anë jeni?

Kryetari i AAK-së, Ramush Haradinaj, ka reaguar pas shumë deklaratave nga zyrtarët e pushtetit kundër tij, lidhur me hapjen e Urës.

Deputetë e zyrtarë të ndryshëm, e kanë pyetur Haradinajn se “në cilën anë të urës është”.

Haradinaj ka shkruar se është në çdo milimetër të Kosovës. E ka pyetur pushtetin, se në cilën anë janë ata.

Postimi:

Nuk është hera e parë që kanë provuar të më pozicionojnë “këndej ose andej ure”, duke dashur të ma vendosin kufirin ne mes!

Kanë provuar edhe Pejën të ma ndajnë me lum, kanë provuar që të ndajnë Mitrovicën me lum, besa edhe krejt Kosovën duke i vendosur disa kufij të ri, në emër të njëfarë shkëmbimi territorial.

Por, as atëherë e as sot, s’kanë gjetur te unë aleat të ndarjes, e nuk do të gjejnë kurrë.

Albin Kurti, përmes sejmenëve të tij, ma paska bërë një pyetje publike se “nga cila anë e urës” jam unë! Po pse u dashka që unë të jem në njërën anë të urës! Unë jam ku kam qenë gjithmonë, në çdo milimetër të territorit të Kosovës dhe se tek Ura e Ibrit nuk ka dy anë.

Po ju që po pyesni nga cila anë, a po sugjeroni që atë pjesë ta ndani në dysh, apo si e keni hallin?! Ose në cilën anë jeni ju, që ta marrim vesh njëherë e mirë!