AGK: Precedent i rrezikshëm thirrja e Presidentes Osmani për hetime ndaj mediave

Asociacioni i Gazetarëve të Kosovës ka reaguar pas thirrjes së Presidentes Osmani që të hetohen mediat, posaçërisht ndaj Nacionales, shkruan Periskopi.

AGK e ka konsideruar si precedent të rrezikshëm thirrjen e organeve të sigurisë për hetim ndaj mediave, duke i bërë thirrje Osmanit që t’i drejtohet KMSHK’së për pakënaqësi eventuale në raportim.

“…Asociacioni i Gazetarëve të Kosovës – AGK, e konsideron si një precedent të rrezikshëm e të papranueshëm thirrjen eksplicite të Presidentes së Kosovës, Vjosa Osmani për hetime ndaj medieve, posaçërisht gazetës Nacionale dhe drejtuesit të saj, Berat Buzhala… AGK-ja, e fton Presidenten Osmani që për pakënaqësitë eventuale me raportimin t’i drejtohet me ankesë KMShK’së.”- thuhet në postim.

Postimi i plotë:

Precedent i rrezikshëm thirrja e Presidentes Osmani për hetime ndaj mediave

Asociacioni i Gazetarëve të Kosovës – AGK, e konsideron si një precedent të rrezikshëm e të papranueshëm thirrjen eksplicite të Presidentes së Kosovës, Vjosa Osmani për hetime ndaj medieve, posaçërisht gazetës Nacionale dhe drejtuesit të saj, Berat Buzhala.

Një një postim publik sot, Presidentja në së paku dy raste u bën thirrje, si organeve të sigurisë edhe atyre të drejtësisë, që të hetojnë median në fjalë, pas publikimit të një lajmi rreth vrasjes së një personi mbrëmë në Ferizaj. Për më tepër, akuza e përsëritur se mediat punojnë për Serbinë, është e papranueshme, dhe më e rrezikshme kur vjen nga kreu i shtetit.

AGK-ja, e fton Presidenten Osmani që për pakënaqësitë eventuale me raportimin t’i drejtohet me ankesë Këshilli i Mediave të Shkruara të Kosovës – Press Council of Kosovo. Është punë e medieve që, duke respektuar Kodin e Etikës, sidomos për ngjarje tragjike, të bëjnë punën e tyre duke ofruar fakte e dëshmi për rrethanat e ngjarjes.