Faton Hajrizi iku nga burgu në Kosovë, e gjeti “belaja” në Serbi, si u përfshi në vrasjen e policit serb?

Faton Hajrizi është personazhi më i përfolur i ditëve të fundit. Rreth 2 javë më parë ai u arratis nga burgu i Smerkonicës dhe që nga ai moment emri i tij është përmendur në media dhe rrjetet sociale. Së fundmi, ai dyshohet se ka qenë i implikuar në vrasjen e një polici në Serbi. Sipas raportimeve, Hajrizi pas ikjes nga burgu ka qenë në Preshevë dhe derisa po tentonte të kalonte në Bosnje e Hercegovinë është përballur me Policinë e Serbisë, ku njëri nga policët ka mbetur i vdekur. Periskopi ju sjell detaje se çka ka ndodhur deri më tani…

Ministri i Brendshëm i Serbisë, Ivica Daçiq, ka deklaruar sot në orët e para të mëngjesit se në Loznicë, qytet në perëndim të Serbisë, është vrarë një zyrtar policor dhe një tjetër është plagosur rëndë.

Siç është bërë e ditur në kumtesën e ministrisë së Brendshme të Serbisë, policët rreth orës 00:55 gjatë kontrollit të një veturë në pikëkalimin kufitar Liniçka Shora në afërsi me Bosnje e Hercegovinën, kanë ndalur një veturë të markës “Mercedes” me targa të Tutinit, brenda të cilës gjendeshin dy persona.

Gjatë daljes nga vetura, një person ka shtënë me revole, duke e goditur zyrtarin policor serb Nikolla Krsmanoviq (1990) në gjoks, kurse Vjekosllav Illiq (1974) gjithashtu zyrtar policor u qëllua në kraharor – ku më pas sulmuesi është larguar me shpejtësi nga vendi i ngjarjes.

Të dy policët janë dërguar në spitalin e Loznicës, ku Krsmanoviq nuk i mbijetoi plagëve, derisa policit tjetër i është përmirësuar gjendja shëndetësore pas intervenimit kirurgjik.

Faton Hajrizi dhe vëllau i tij, Artani nën shënjestrën e Serbisë pas vrasjes së policit serb

Pas vrasjes së policit serb ministri i punëve të Brendshme Ivica Daqiq pretendoi se i dyshuari për këtë krim është një kosovar.

“Policia në vend të ngjarjes ka gjetur pasaportën e të dyshuarit të lëshuar nga institucionet e Kosovës në emër të Artan Hajrizit, 33 vjeçar”, tha Daçiç për mediat serbe.

Artan Hajrizi: Dokumentat mi mori vëllau, unë jam në Gjermani

Artan Hajrizi, ka mohuar se ka vrar policin serb.

Ai në disa deklarata për medie ka thënë se dokumentat e tij janë vjedhur dhe gjendet në Gjermani.

“Dokumentet  mi ka marrë se kuletën e la në tavolinë në korridor me çelësa me krejt e vëllai ka ndejtë te unë”, tha ai për Dukagjinin.

Ndryshe deri tani janë arrestuar dy persona (burrë e grua) të cilët dyshohen të kenë ndihmuar vrasësin e policit të arratisej.

“Në Bijelinë, pasdite, në bashkëpunim me Policinë e Republikës Srpska, është arrestuar R.Z. (1985), i cili dyshohet se ka organizuar transportin e vrasësit nga Presheva për në Loznicë. Gruaja e tij R.I u arrestua gjithashtu si bashkëpunëtore”, ka thënë Daçiq

Një oficer policie shtiu në drejtim të Faton Hajrizit por nuk arriti ta qëlloj– Dalin detaje të reja për vrasjen në Loznicë