Studentët e Juridikut të Prishtinës, në vendin e tretë në garat mes 364 universiteteve

“Willem C Vis International Arbitration Moot” është garë e arbitrazhit ndërkombëtar komercial dhe cilësohet si gara më e madhe e drejtësisë në botë.

Studentët e Fakultetit Juridik të Universitetit të Prishtinës kanë arritur sukses në garën botërore “Willem C Vis International Arbitration Moot”, të mbajtur në Vjenë. Ata kanë arritur të shkonin deri në gjysmëfinale.

Nga 364 universitete në botë, studentët e UP-së kanë arritur t’i lënë mbrapa 360 universitete të tjera, si Harvardi, Yale, Stanford, Columbia, Oxford, Cambridge, Princeton, Duke, LSE, transmeton albinfo.ch.

Willem C Vis International Arbitration Moot” është garë e arbitrazhit ndërkombëtar komercial dhe cilësohet si gara më e madhe e drejtësisë në botë.

Për këtë sukses i ka uruar presidentja Vjosa Osmani, e cila ka thënë se kjo dëshmon se me punë e përkushtim arrihet gjithçka.

“Në garë me gati 400 Universitete, ekipi i Fakultetit Juridik të Universitetit të Prishtinës arriti në top 3-shen më të mirë në botë! Këto vajza e djem nga Kosova kanë lënë prapa Universitete si Harvardi, Yale, Stanford, Columbia, Oxford, Cambridge, Princeton, Duke, LSE, e qindra universitete të tjera në garën më prestigjoze të drejtësisë, Willem C Vis. Ata po ashtu fituan çmim të veçantë për Memorandumin për palën e paditur. Ky ekip këtu në foto dëshmon se vetëm me punë e përkushtim arrihet gjithçka. Krenare sa më s”ka!”