Rama i reagon “POLITICO”-s për rastin me gazetaren: S’kërkon falje, e quan përkëdhelje miqësore

Kryeministri i Shqipërisë, Edi Rama, i ka reaguar gazetës “POLITICO” lidhur me raportimin që ka bërë për rastin e paprecedent të sjelljes së tij ndaj gazetares shqiptare, Ambrozia Meta, gjatë një konference për media, ditën e djeshme.

Rama as sot s’ka kërkuar falje për veprimin e tij, derisa ka thënë se cilësimi i një “përkëdheljeje miqësore mbi supe” si “agresion” dhe më pas edhe si “frikësim”, pa e kërkuar edhe opinionin e gazetarëve që kanë qenë aty të pranishëm, nuk e tregon të vërtetën.

Sipas tij, përveç kësaj, tregon edhe mungesë respekti për “ viktimat e vërteta të agresionit dhe frikësimit në fushën e sotme të gazetarisë”.

Në këtë reagim, kryeministri Rama pretendon se situata e sigurisë së gazetarëve është përmirësuar dukshëm dhe tashmë gazetarët në Shqipëri s’përballen me plumba, sulme e frikësime.