Prokuroria Speciale tërhiqet nga ndjekja penale ndaj të akuzuarit për krim të organizuar

Në këtë rast, Gjykata kishte marrë aktgjykim lirues ndaj ish-kryetarit të Komunës së Gjilanit, Qemajl Mustafa dhe të akuzuarve tjerë, raporton “Betimi për Drejtësi”.

Prokurori special, Burim Çerkini, në fillim të shqyrtmit gjyqësor u tërhoq nga ndjekja penale ndaj të akuzuarit Govori, me arsyetimin se 35 të akuzuarit e tjerë janë liruar nga aktakuza dhe atë me aktgjykim të formës së prerë, e që veprimet e të akuzuarit Govori kanë qenë të përfshira së bashku me tjerët.

Prokurori Çerkini, tha se ndaj të akuzuarit Govori në këtë çështje penale ishte veçuar procedura, ndërsa sa i përket të tjerëve ka përfunduar procedura.

Ai tha se ka një aktgjykim të Gjykatës Themelore në Pejë, i cili ishte pasuar me aktgjykim të Gjykatës së Apelit, me të cilin është vërtetuar aktgjykimi dhe të akuzuarit janë liruar në mungesë të provave.

“Duke qenë se i akuzuari Burim Govori ka qenë pjese e kësaj aktakuze për veprat penale për të cilin është dyshuar dhe akuzohet, Burim Govori, kanë qenë në bashkëkryerje dhe si pjesë e grupit të akuzuarit të tjerë ku kemi një aktgjykim të formës së prerë. Ndaj të akuzuarit Burim Govori terhiqemi nga ndjekja penale”, tha prokurori Çerkini.

Andaj, shqyrtimi gjyqësor përfundoi me shpalljen e aktgjykimit refuzues.

Gjykata Themelore në Pejë, më 13 prill 2023, shpalli aktgjykim lirues ndaj Qemajl Mustafës dhe 34 të akuzuarve tjerë, kurse Apeli e vërtetoi këtë aktgjykim.

Kujtojmë se “Betimi për Drejtësi” në emisionin e 275-të me titull “Dështimi i Prokurorisë në shkallë të parë: Rasti Qemajl Mustafa”, kishte sjellë hulumtimin rreth dështimit të Prokurorisë në shkallë të parë, në këtë rast.

Ndryshe, sipas aktakuzës së Prokurorisë Speciale të Republikës së Kosovës (PSRK) të ngritur më 16 shtator 2016, në Komunën e Gjilanit janë bërë dallavere me 18 tenderë, për çka fillimisht ngarkoheshin 39 të pandehur, prej të cilëve 29 kanë qenë zyrtarë komunalë dhe 10 operatorë ekonomikë.

PSRK pretendonte se ish-kryetari i Komunës së Gjilanit, Qemajl Mustafa dhe tjerët, kanë bërë kurdisjen e tenderëve, me qëllim që ato t’i fitojnë disa biznese të caktuara, andaj ngarkoheshin me vepra penale të krimit të organizuar lidhur me veprën penale të shpërdorimit të pozitës zyrtare si dhe keqpërdorimit të autorizimeve në ekonomi.

Gashi: Kurti duhet të dorëhiqet së pari e pastaj ne e shpërndajmë Kuvendin