Pas raportimit të Periskopit, Policia dhe Inspektorati kanë lokalizuar vendin ku janë hudhur barnat me afat të skaduar (VIDEO)

Në redaksinë e Periskopit ka arritur video/pamje mjaft shqetësuese të këtyre produkteve farmaceutike të hedhura në rrugë.

Periskopi ka kontaktuar me Petrit Sinanin, drejtor në Drejtorinë e Inspekcionit në Komunën e Drenasit, ku pas raportimit i njëjti ka bërë me dije se është lokalizuar vendi dhe se janë duke shkuar me Policinë për t’u marrë me procedura të mëtutjeshme.

“Natyrisht që jam në dijeni dhe e kemi lokalizu vendin ku ka ndodhë hudhja e produkteve farmaceutike, tash jemi duke dalë me Policinë në vendin e ngjarjes”, tha Sinani për Periskopin.

Ai ndër të tjera bëri me dije se ka telefonuar Inspektoratin e Mjedisit dhe atë Farmaceutik, duke thënë se të njëjtit vetëm kanë hedhur fajin mes njëri-tjetrit.

“Unë i kam telefonuar Inspektoratin Farmaceutik, ata gishtin e drejtuan nga Inspektorati i Mjedisit, i kam telefonuar edhe këta të fundit, por siç edhe ndodh këtu, fajin ia gjuajnë njëri-tjetrit.
Lokacioni është shumë i fshehtë, mirëpo e kemi lokalizu dhe janë marrë të gjitha masat, tash jemi duke shku me policinë e Kosovës dhe me vazhdu me procedurat e mëtutjeshme. Personalisht jam shumë i zhgënjyer me qasjen e Inspektoratit Farmaceutik, por edhe të Mjedisit. Edhe pse për mendimin tim, Inspektorati i Mjedisit nuk ka aq shumë përgjegjësi në këtë rast, sa ka Inspektorati i Mjedisit, por unë jam duke i marrë të gjitha masat dhe do të ua dërgoj me foto të gjitha palëve dhe do t’i shprehi pakënaqësitë e mija”, përfundoi Sinani për Periskopin.