Masakra që turpëron Putinin, Kremlini shpërfilli paralajmërimet amerikane

Shtetet e Bashkuara e kishin paralajmëruar Moskën se militantë të ISIS-it po planifikonin të sulmonin Rusinë, pak ditë para se agresorë të armatosur të mësynin sallën e koncerteve në perëndim të Moskës, duke vrarë dhjetëra spektatorë.

Por, Presidenti Vladimir Putin i shpërfilli informacionet, duke i cilësuar ato si provokuese. Ekspertët thonë se përmasat e masakrës janë thellësisht turpëruese për liderin rus, i cili vetëm një javë më parë përcolli mesazhin e sigurisë kombëtare pasi fitoi mandatin e pestë në krye të Kremlinit. Jo vetëm që shërbimet inteligjente dështuan ta parandalonin sulmin, sipas tyre, por Putin kishte dështuar t’i vinte veshin paralajmërimeve nga Uashingtoni se ekstremistët po përgatisnin sulm në Moskë.

David Herszenhorn, kryeredaktor i “Washington Post”, tha: “Putin me gjasë do të përballet me kritika të forta lidhur me këtë. Ai refuzoi këshillat amerikane duke i cilësuar si shantazh dhe përpjekje për të destabilizuar shoqërinë ruse. Dhe në fakt kjo është një kujtesë se është e vështirë përmes mjegullës së kësaj lufte në Ukrainë dhe marrëdhënieve të përkeqësuara midis Rusisë dhe Perëndimit, të ekzistonte një mundësi reale që Rusia dhe Shtetet e Bashkuara, Rusia dhe Perëndimi, të ishin partnerë kundër armiqve të vërtetë si ISIS”.