Krejt çka dihet për ngjarjen tragjike në Prishtinë ku mbeti një i vrarë dhe një e plagosur

Një ngjarje tragjike ka ndodhur mbrëmë në Prishtinë. I riu, Egzon Haziri (rreth moshës 30 vjeçare), ka humbur jetën, ndërsa dy të tjerë kanë mbetur të plagosur si pasojë e të shtënave.

Haziri s’ka arritur që t’i përballojë plagët e marra dhe si pasojë ka ndërruar jetë.

Vdekjen e të riut e ka konstatuar ekipi mjekësor, ndërkohë gruaja e palgosur është dërguar me urgjencë në Emergjencën e Qendrës Klinike Universitare të Kosovës për trajtim mjekësor.

Ndërsa sipas burimeve të Periskopit gruaja që ka mbetur e plagosur ishte kalimtare e rastit dhe nuk ndërlidhet me konfliktin që rezultoi me vrasje e plagosje.

Ndërkohë lidhur me rastin janë deklaruar edhe nga Policia e Kosovës, të cilët pohuan se po kryejnë ekzaminimet e nevojshme që ndihmojnë në zbardhjen e rrethanave të rastit.

Agron Borovci, zëdhënës në policinë rajonale të Prishtinës ka dhënë detaje nga ngjarja.

“Rreth orës 21:15, është raportuar për gjuajtje me armë zjarri të ndodhur në rrugën “Jeronim De Rada” në Prishtinë. Me të marrë informatën, policia ka dalë në vendin e ngjarjes dhe nga informacionet e para është bërë e ditur se për pasojë dy persona kanë marrë plagë nga arma e zjarrit ku  fatkeqësisht njëri nga ta ka ndërruar jetë”, tha Borovci për Periskopin.

Policia po punon në identifikimin dhe kapjen e të dyshuarve, teksa e plagosura po trajtohet në QKUK.

“Ndërkohë që e plagosura është dërguar në QKUK për trajtimin e nevojshëm mjekësor, policia po vijon punën e saj me veprime të ekzaminimit të vendngjarjes si dhe me veprime të tjera operativo-hetimore me qëllim identifikimin e të dyshuarve të implikuar në rast, si dhe sqarimin e plotë të rrethanave të ngjarjes”, tha ai.