Ish-kryetari i Malishevës dhe njëri i akuzuar mbrohen në heshtje, dy të tjerë japin mbrojtjen

Begaj deklaroi se pas konsultimit me mbrojtësin e tij, avokatin, Rrahman Kastrati do e shfrytëzojë të drejtën e tij ligjore të mbrohet në heshtje dhe për shkak të gjendjes jo të mirë shëndetësore. Në heshtje u mbrojt edhe Berisha.

Në këtë rast, për korrupsion për shkak të shpronësimeve dhe shpalljes së ‘Zonës ekonomike” të Malishevës po akuzohen ish-kryetari i Malishevës, Ragip Begaj bashkë me ish-ministrin Bajram Hasani e zëvendësministrin Faton Thaqi. Pjesë e aktakuzës për korrupsion janë edhe Hajdin Berisha, Bashkim Krasniqi, Malë Krasniqi.

Ndërsa, Ahmet Rrahmanaj, akuzohet për veprën penale “Shpëlarje parave”, kurse Nazmi Kafexholli akuzohet edhe për veprën penale “Mashtrim”.

Në seancën e së mërkurës, të akuzuarit Bashkim Krasniqi dhe Malë Krasniqi, dhanë mbrojtjen e tyre.

I akuzuari Bashkim Krasniqi tha se kërkesa fillestare e Komunës së Malishevës për themelimin e Zonës Ekonomike është dorëzuar dhe protokoluar në Ministrin e Tregtisë dhe Industrisë (MTI).

Po ashtu, ai deklaroi se pasi është bërë kërkesa e parë nga Komuna e Malishevës, për shkak të mospërputhjeve të të dhënave të kësaj kërkese, ishte është bërë një vërejtje.

“Përmes telefonit, nënkryetari Hajdin Berisha më ka kërkuar që të bëhen përmirësimet e nevojshme, nuk ka pas dokumentacion vetëm përmes telefonit”, tha i akuzuari Krasniqi.

Ai tha se nuk ishte i detyruar të intervenonte në plotësim-ndryshimin e kërkesës.

Kurse, i akuzuari Malë Krasniqi tha se nuk e ka shfrytëzuar autoritetin e tij zyrtar si dhe kompetencat e tij që ta mundësonte shpalljen e zonës me interes të veçantë ekonomik, me qëllim të themelimit të Zonës Ekonomike në Komunën e Malishevës.

Ai tha se tha se kompetencat tij kishin qenë, matjet kadastrale, shpërndarja e lëndëve tek zyrtarët të tjerë dhe nënshkrimi i manualeve të matjeve gjeodezike.

Krasniqi tha se për punën e tij llogari i kishte dhënë drejtorit të Gjodezisë, tani të akuzuarit Bashkim Krasniqi.

Më tej, i akuzuari Krasniqi deklaroi se nuk e kishte blerë apo marrë me qira tokë në zonat që ishte planifikuar të themelohet zona ekonomike.

Sipas aktakuzës, Ragip Begaj, Hajdin Berisha, Bashkim Krasniqi, Malë Krasniqi, Bajram Hasani, Nazmi Kafexholli dhe Faton Thaqi, akuzohen se kanë kryer veprën penale të “Keqpërdorimit të pozitës apo autoritetit zyrtarë”.

Ahmet Rrahmanaj, akuzohet për veprën penale “Shpëlarje e parave”, ndërsa Nazmi Kafexholli akuzohet edhe për veprën penale “Mashtrim”.

Sipas aktakuzës, Begaj akuzohet se në cilësinë e kryetarit të Komunës së Malishevës, në bashkëkryerje me ministrin e atëhershëm të Tregtisë dhe Industrisë, Bajram Hasani dhe zëvendësministrin e kësaj ministrie, Faton Thaqi duke shfrytëzuar pozitën e tyre zyrtare me qëllim të përfitimit të kundërligjshëm të dobisë pasurore, kanë mundësuar shpronësimin në zonat kadastrale Banjë, Bellanicë dhe Senik, duke e shpallur zonë me interes të veçantë.

Sipas aktit akuzues, Bashkim Krasniqi në cilësinë e drejtorit për Gjeodezi dhe Kadastër, Malë Krasniqi në cilësinë e shefit të shërbimeve të Gjeodezisë, Hajdin Berisha në cilësinë e nënkryetarit të komunës dhe Faton Thaqi në cilësinë e zëvendësministrit, akuzohen se në bashkëkryerje nga periudha kohore 22 maj 2018 deri më 5 qershor 2018, varësisht nga pozitat, kanë shfrytëzuar autoritetin zyrtar, duke tejkaluar kompetencat e tyre kanë mundësuar shpalljen e zonës me interes të veçantë ekonomik me qëllim të themelimit të Zonës Ekonomike në Komunën e Malishevës, në zonat kadastrale Banjë, Bellanicë dhe Senik në mënyrë që të vazhdohej me procedurat e shpronësimit.

Tutje në aktakuzë thuhet se i akuzuari Malë Krsaniqi, pasi e kishte ditur për krijimin e Zonës Ekonomike, kishte blerë pronë në zonat kadastrale Banjë dhe Lladrovc me çmim prej 25 euro për ari, duke qenë në dijeni se këto prona do të shpronësohen nga Qeveria e Kosovës, e ku çmimi do të ishte shumë më i lartë.

Sipas aktakuzës i akuzuari Nazmi Kafexholli, akuzohet se në cilësinë e inspektorit në Agjencinë e Pyjeve të Kosovës, duke qenë në dijeni për krijimin e Zonës Ekonomike, dhe me qëllim që t’i rrit vlerën tokës, kishte marrë me qera pronën e të ndjerit M.H. ku kishte ngritur pemishte për çka kishte përfituar edhe grante nga Ministria e Bujqësisë.

Tutje, sipas aktit akuzues, Ahmet Rrahmanaj nga viti 2007 deri më 2013 në vazhdimësi duke e ditur se parcelat e tokës në pronësi shoqërore janë blerë dhe krijuar me aktivitete kriminale, ka transferuar dhe njëkohësisht ka tentuar të transferojë pronat me qëllim të fshehjes apo maskimit të natyrës dhe shmangies nga pasojat juridike.

Në aktin akuzues thuhet se Rrahmanaj, ka privatizuar pronat e “Neëco Mirusha” tokë bujqësore në zonat kadastrale Banjë, Bellanicë dhe Senik në Komunën e Malishevës me çmim artificialisht të ulët 1,222,333.00 euro sipërfaqe prej 1,157 hektarë e 51 ari për 99 vite, për këtë i akuzuari më 11 korrik 2013 ka bërë bartjen e tokës në emër të personit tani të ndjerë M.H. si përfitues i tokës në sipërfaqe prej 203 hektar e 11 ari, ku për këtë transaksion, të akuzuarit i ishin transferuar 200 mijë euro në llogari bankare, mirëpo të njëjtat ia kishte kthyer të ndjerit M.H. dhe gjithë kjo ishte bërë me qëllim të kinse shitblerjes që kishte ndodhur në vitin 2007. /BetimipërDrejtësi

Turizmi vitin e kaluar i solli Shqipërisë mbi 4 miliardë euro