“Super-këshilltari” i Gërvallës me gjuhë fyese ndaj zëdhënësit të BE-së

Konsulenti i jashtëm i Ambasadës së Kosovës në Bruksel, Gani Jakupi, që paguhet në muaj më shumë se presidentja e Kosovës, kryeministri e kryetari i Kuvendit, i ka reaguar zëdhënësit të BE-së, Peter Stano, pasi ky i fundit në një konferencë për media ka thënë se vendimi BQK-së për Rregulloren e re duhej të jetë proces i negociatave në Bruksel

Jakupi, ndonëse konsulent i Ambasadës së Kosovës në Bruksel i ka reaguar zëdhënësit të BE-së, Peter Stano, me gjuhë të papërshtatshme duke përdorur shkurtesën “WTF”.

“WTF?! Që kur sistemi i brendshëm bankar i një shteti sovran duhet të respektojë një “zgjidhje të negociuar” në një subjekt të huaj?”, ka shkruar Jakupi.

Ai madje thotë se kjo qasje, sipas tij “koloniale” s’është asgjë e re, dhe shpreh frikën e tij se “po del jashtë kontrolli”.

“Qasja koloniale nuk është asgjë e re, por ja që po i del pak nga kontrolli, kam frikë…”, ka shkruar tutje.

Gani Jakupi për periudhën 1 vjeçare që do të shërbej si konsulent i jashtëm do të paguhet 7 mijë e 500 euro për çdo muaj nga buxheti i Republikës së Kosovës.