ShBA-ja kryen sulme të reja ndaj Huthëve

Forcat amerikane kanë kryer sulme në Jemen ndaj dhjetë dronëve sulmues dhe një stacioni tokësor kontrolli që i përkisnin lëvizjes rebele jemenase, Huthi, bëri të ditur ushtria amerikane.

Një luftanije amerikane po ashtu ka rrëzuar një raketë që përdoret kundër anijeve, që u lëshua nga Huthët, dhe më pas rrëzoi edhe tre dronë iranianë, tha Qendra amerikane e Komandës, shkruan Rel.

Përderisa Shtetet e Bashkuara së fundi kanë kryer sulme ndaj Huthëve dhe grupeve të tjera në rajon që mbështeten nga Irani, si Uashingtoni po ashtu edhe Irani kanë tentuar të shmangin një konfrontim direkt, por rrëzimi i tre dronëve iranianë mund të rrisë tensionet.

Në orët e para të së enjtes, forcat amerikane thanë se kanë shënjestruar “një stacion tokësor të kontrollit të dronëve dhe dhjetë dronë” që sipas Qendrës amerikane të Komandës “paraqisnin kërcënim të menjëhershëm për anijet tregtare dhe anijet e marinës amerikane në rajon”.

Më herët, ushtria amerikane njoftoi se luftanija USS Carney rrëzoi një raketë balistike kundër anijeve që u gjuajt nga Huthët, dhe më pak se një orë më vonë rrëzoi edhe tre dronë iranianë.

Forcat amerikane po ashtu të mërkurën shkatërruan një raketë kundërajrore që paraqiste kërcënim të drejtpërdrejtë “për një avionë luftarakë amerikanë”. Megjithatë, ushtria nuk specifikoi se në çfarë lokacioni kreu këto sulme, por tha se ato u kryen “në zonat në Jemen të kontrolluara nga Huthët”.

Rebelët e Huthit nisën sulmet ndaj anijeve në Detin e Kuq në nëntorin e kaluar, duke thënë se sulmet shënjestrojnë anijet e lidhura me Izraelin, në mbështetje të palestinezëve në Gazë.

Izraeli dhe Hamasi – grupi palestinez i shpallur organizatë terroriste nga SHBA-ja dhe Bashkimi Evropian – po luftojnë që nga 7 tetori.

Forcat amerikane dhe britanike janë kundërpërgjigjur me sulme ndaj Huthëve dhe rebelët kanë deklaruar se interesat amerikane dhe britanike po ashtu do të konsiderohen nga ata si caqe legjitime.

SHBA-ja po ashtu ka ngritur një task-forcë detare shumëkombëshe për të mbrojtur anijet tregtare që kalojnë në Detin e Kuq, që është një rrugë kyçe tregtare ku kalin 12 për qind e tregtisë së botës.

Megjithatë, Huthët kanë vazhduar sulmet dhe të mërkurën thanë se kanë shënjestruar një anije amerikane të tregtisë që ishte nisur drejt Izraelit, duke pretenduar se “disa raketa e goditën direkt anijen”.

Firma e sigurimit të anijeve, Ambrey, tha se një anije komerciale raportohet se është shënjestruar me një raketë në jugperëndim të Gjirit të Adenit dhe se anija raportoi për një shpërthim. Megjithatë, kjo kompani nuk tregoi se nga ishte kjo anije.

Më herët, Huthët thanë se kanë sulmuar me disa raketa luftanijen amerikane USS Gravely, një pretendim që erdhi pasi ushtria amerikane tha se ka rrëzuar një raketë lundruese që ishte lëshuar “drejt Detit të Kuq nga zonat e kontrolluara nga Huthët në Jemen”.