Ramadani: Tejet shqetësuese, KFOR-i ta sqarojë se pse nuk lejoi ministrin Krasniqi të hyjë në objektin e komunës së Zveçanit

Ai thotë se ‘ka pasur edhe komunikime të KFOR-it me nivelin e lartë qeveritarë që t’i lejohej hyrja z.Kransiqi në objektin e komunës’ por prapë ‘kjo nuk është lejuar’.

Ramadani shkruan:

“Duhet sqarim nga KFOR – pse ndaloi Ministrin Elbert Krasniqi të hyjë në objektin komunal në Zveçan?

Ministri Krasniqi, një ministër aktiv, përfaqëson shtetin e Kosovës kudo që shkon.

Dhe, t’i ndalohet hyrja në objektin komunal në Zveçan, pra brenda shtetit, është e paprecedent dhe shqetësuese.

Ministër Elbert Krasniqi, çka ndodhi? Cili ishte arsyetimi i KFOR-it?

Pse nuk ndryshuan qëndrim ushtarët e KFOR-it edhe pas disa komunikimeve tua me nivelin më të lartë qeveritar?

Transparenca ndihmon demokracinë.

Ky rast nuk është i thjeshtë, por tejet shqetësues.

Ministri i Republikës nuk duhet të ndalet nga KFOR-i dhe nga askush në këtë botë për të kryer punën e vet!”, shkruan Ramadani sot.

Z.Burim Ramadani, dje nëpërmjet një statusi në Facebook, alaramoi për këtë informacion duke shkruar:

“Komandanti i KFOR-it duhet të sqarojë opinionin pse ka dhënë urdhër të këtillë?

Komandanti i KFOR-it nuk ka të drejtë të kthejë Ministrat e Qeverisë së Kosovës nga vizitat në objektet komunale.

Kjo ka ndodhur të hënën në Zveçan. Pa asnjë pikëpyetje!

Ministri Elbert Krasniqi është kthyer mbrapsht nga ushtarët e KFOR-it.

Atij i është thënë se “vetëm punëtorët e komunës dhe qytetarët e Zveçanit mund të hyjnë në objekt!”

Komunikimi aty nuk ka qenë krejt i thjeshtë.

As tentimet për intervenim nga lart nuk kanë kryer punë!

Urdhri ka qenë nga Komandanti i KFOR-it.

Edhe njëherë, KFOR nuk ka mandat të kufizojë lirinë e lëvizjes dhe qasjen ne objekte publike për institucionet e Kosovës, në këtë rast Ministrin Krasniqi.

Kjo nuk bjen as në detyrën për sigurim të ambientit të sigurt dhe as në detyrën për deterrim të kërcënimit të sigurisë.

Komandanti i KFOR-it duhet të sqarojë pse ka dhënë urdhër të këtillë?

Çka ka ndihmuar kjo në ambientin e sigurisë?

Cili ka qenë rreziku i sigurisë në vizitën e Ministrit të Republikës së Kosovës?

Në të njëjtën kohë, kjo është shenjë serioze për nivelin e raporteve midis institucioneve politike të shtetit të Kosovës dhe KFOR-it.”, shkruan Ramadani./Periskopi