Ramadani: Lista Serbe organizoi dy aktivitete të mëdha që kur i mori 360 mijë euro nga shteti i Kosovës

Eksperti i sigurisë, Burim Ramadani, njëherit një nga zërat publik më të zëshëm në Kosovë lidhur me fondin prej 360 mijë euro që Lista Serbe ka marrë nga buxheti i shtetit të Kosovës, shkruan edhe një herë:

A u inkurajua Lista Serbe me buxhet të Kosovës?

Lista Serbe – që nga ndarja e buxhetit për të më 12 janar 2024 – organzoi dy aktivitete të mëdha:

1. Peticionin për shkarkimin e katër kryetarëve të komunave në veri;
2. Protestën në Mitrovicë të Veriut.

Mos të përmendim komunikatat për media dhe letrat dërguar ambasadave të huaja.

Dhe…një heshtje misterioze nga institucionet e Kosovës!

Pyetja në këtë heshtje të mistershme të institucioneve është:

• A u inkurajua Lista Serbe me 360.000 euro nga Kosova?

Paraprakisht,

Më 26 shtator 2023, Lista Serbe shpalli 3 ditë zie për paramilitarët që sulmuan në Banjskë. Zhvilloi homazhe publike për këta paramilitarë e terroristë dhe urdhëroi zbritjen e flamurit serb në gjysëm-shtizë në vendbanimet ku jetojnë serbët në Kosovës.

Po atë ditë, Qeveria e Kosovës/Ministri i Punëve të Brendshme konstatoi se Lista Serbe me Serbinë kanë autorësinë e sulmit në Banjskë.

Por, më pas, pa fije logjike as ligjore dhe as patriotike, më 12 janar 2024, KQZ ia ndau 360.000 euro të buxhetit të Kosovës.