Rama i shkarkon drejtorët e PDK’së për mungesë suksesi, amniston vetëm përgjegjësin për qentë endacakë

Kryetari Përparim Rama ka shkarkuar dy drejtorë të komunës së Prishtinës, që vinin nga radhët e Partisë Demokratike të Kosovës, me arsyetimin për mungesë të suksesit. Por për çudi, vetëm drejtorin nga radhët e LDK’së e ka amnistuar duke e bërë përgjegjës për zgjidhjen e problemit të qenve endacak në kryeqytet.

Rama drejtorin për Siguri dhe Emergjenca, Lulzim Fushticën, nuk e ka shkarkuar për mossukses në zgjidhjen e problemit të qenve endacak, por vetëm i ka kërkuar që ta ndryshojë gjendjen në mënyrë substanciale deri në fund të këtij viti.

“Një çështje tjetër që po preokupon shumë qytetarët e Prishtinës dhe ende nuk i kemi dhënë zgjidhje, janë qentë endacak. Andaj, sot kam kërkuar nga Drejtori për Siguri dhe Emergjenca që të ndyshojë gjendjen në mënyrë substanciale deri në fund të këtij viti. Siguria dhe mirëqenia e qytetarëve, për mua është një prej elementeve më të rëndësishme të qeverisjes”, ka njoftuar Rama.

Rikujtojmë se dy drejtorët e Komunës së Prishtinës, që vinë nga radhët e Partisë Demokratike të Kosovës, Rama i ka shkarkuar nga pozitat e tyre për mungesë suksesi në fushat e tyre.

Rama ka shkarkuar Donjeta Sahatçiun nga pozita e Nënkryetares së Kryeqytetit dhe pozita e Ushtrueses së Detyrës së Drejtores së Arsimit. Poashtu para disa dite ai ka njoftuar edhe për shkarkimin e Drejtorit të Shërbimeve Publike, Ilirik Musliu, i cili vinte nga Partia Demokratike e Kosovës.