Përkujtimi i ‘Natës së Tmerrit’, Mehmetaj: Kurti po gënjen, ja neni në ligj që thotë të kundërtën

Gazetari Lirim Mehmetaj, demanton kryeministrin Albin Kurti rreth asaj se çka shkruajti për ‘amnistinë e kriminelëve të veriut të Kosovës nga liderët shqiptarë të asaj kohe’.

Mehmetaj ka publikuar nenin e Ligjit për Amnistinë, që në fakt, e thotë të kundërtën e saj që shkroi kryeministri Kurti.

Mehmetaj shkruan:

Kur e mendon popullin analfabetë të krijohet përshtypja se mund ta gënjesh sa herë të duash në çfarëdo teme që do dhe prapë nuk ka asnjë pasojë.

Prandaj Kurti gënjen brutalisht edhe për raste të ndjeshme siç është përkujtimi i masakrës së shkurtit të vitit 2000 kur shqiptarët u vranë, plagosën dhe dëbuan nga veriu i Mitrovicës prej forcave kriminale serbe.

Ai në përkujtimin e tij, shkroi se “Ajo (masakra) u realizua nën vëzhgimin e trupave ushtarake të KFOR-it, kurse u pasua nga mosveprimet e liderëve politikë shqiptarë asokohe në Kosovë. Madje, këta të fundit, në vitin 2013 patën votuar në Kuvendin e Kosovës ligj për aministimin e kriminelëve në veri të Kosovës”.

Në fakt, e vërteta është krejt ndryshe.

Nëse e shikoni Ligjin për Amnistinë, te Nenin 4, Përjashtimet nga Amnistia, bëhet e qartë se, pos tjerash, nga amnistia përjashtohen “veprat penale që kanë rezultuar me lëndim të rëndë trupor ose me vdekje”.

Pra, Kurti gënjen pa e pas as më të voglin dert.

Kjo është çudita e parë.

Çudia e dytë – akoma më e madhe se e para – është se si partitë e sotme opozitare që në vitin 2013 ishin në pushtet, nuk reagojnë kundrejt kësaj rrene brutale që bëhet në llogari të tyre.

Nuk po mund ta kuptoj dot pse.