Bislimi – BE’së: Mos na detyroni ta eskalojmë situatën prapë

Ai tha se ‘ligjet në Kosovë nuk i miraton zyra e BE-së’ por institucionet përkatëse. Bislimi pati edhe një mesazh për bashkësinë ndërkombëtare, më saktësisht Bashkimin Evropian: “Mos na detyroni ta eskalojmë situatën prapë”.

“Vendimet tona ose duhet të jenë perfektë ose sanksione. Nëse vendimi juaj nuk është perfekt, më i mirë se i një vendi skandinav, nuk thuhet ky vendim ka të meta por sanksione.

Mendoj që brenda një vendimi shumë të keq dhe vendimi shumë të mirë ka disa nuanca ku pastaj mund të vendoset një qëndrim i autoriteteve të Kosovës.

Por që nga viti 2011, Kosova nuk është më në pavarësi të mbikëqyrur. Ligjet i miratojnë ministritë përkatëse e jo zyra e zotit Sunyuong.

Kosova është e pavarur nga viti 2008. Të mos insistohet në vazhdimësi a jeni koordinu, a jeni koordinu”, tha ai, përcjell Periskopi.

Kur foli për masat e BE-së që janë në fuqi, Bislimi tha:

“Masat janë për de-eskalim të situatës. Brukseli ka menduar që sulmi i kriminelëve serbë më datë 29 maj, ka mujtë me u evitu sikur Kosova të mos i dërgonte kryetarët në veri. Më 3 qershor ka qenë një deklaratë ku një burokrat i Brukselit, e shpjegon se cka në mendimin e tij nënkupton de-eskalim. Pastaj, kemi pasë takimin në Bratisllavë ku jemi dakorduar. Deklarata e Bratisllavës e ka një titull, aranzhimet mes Kosovës dhe BE-së për përmbushjen e deklaratës së 27 vendeve të BE-së. Qito janë dakordimet tona, se si përmbushen kërkesat e 27 vendeve. Ato kushte i kemi përmbushë.

Unë po them, nëse BE thotë e kemi edhe një kusht, ato pushojnë si masa për de-eskalim. Ka tendencë që të njëjtin produkt me ta shitë pesë herë”, tha ai.

Por, Bislimi pati edhe një mesazh kërcënues për BE-në:

“Mos na detyroni me eskalu situatën për me iu tregu që e de-eskalojmë prapë.

BE na ka thënë neve vetë, në këtë zyre, që është e pakuptimtë për neve që Kosova është nën masa pse ka dërgu katër kryetarë në komunat e tyre në veri, që nuk përbën asnjë lloj krimi, e Serbia ka bërë krim në Kosovë”, tha ai./Periskopi