Asamblistja e LVV-së nënshkruan në emër të punëtorëve që nuk shkojnë në punë

Kjo grevë që nisi në mesin e muajit janar, e bllokoi operimin e kompanisë duke pamundësuar grumbullimin e mbeturinave në Ferizaj dhe vendet përreth. Funksionimin e kompanisë publike e bllokoi greva, por grevën e mundësoi edhe përkrahja politike e Lëvizjes Vetëvendosje në Ferizaj.

Një video të cilën e ka siguruar Gazeta Blic, tregon se si asamblistja e Lëvizjes Vetëvendosje, Yllka Neziri shihet para hyrjes së objektit të KRM “Pastërtia” duke falsifikuar nënshkrimet e punonjësve që nuk shkojnë në punë.

VIDEO KËTU

Pamjet e shfaqin asamblisten derisa i hedh nënshkrimet e paraqitjes në punë në emër të punëtorëve grevistë që nuk shkojnë fare në punë. Ajo vendos me shpejtësi nënshkrimet në emër të punëtorëve të KRM “Pastërtia” mbi një tavolinë pranë një objekti në hyrje të kompanisë, tregojnë pamjet.

Video është regjistruar në fund të muajit janar. Derisa përfaqësuesja politike e LVV-së firmoste në emër të punëtorëve grevistë, Vetëvendosje në Ferizaj e shfrytëzonte mbushjen e bërllokut në qytetin e Ferizajt për të goditur politikisht pushtetin lokal të PDK-së.

“Sot qytetarët e Ferizajit nga të gjitha lagjet e fshatrat e deri në kufijtë më të skajshëm administrativ të tij, nga Gërlica e Rakaj në Bablak e Tërrn; nga Dardania e Zllatari në Nerodime, Greme e Gaçkë e deri në zemrën e qendrës së qytetit nga Lagja e re na kanë dërguar fotografi të tmerrshme nga grumbullimi i mbeturinave tash e ca ditë të cilat edhe po i ndajmë bashkë me ju!”, shkruante LVV – Dega në Ferizaj në një reagim në javën e parafundit të janarit.

“Ndërkaq kryetari i komunës si një struc fshehë kokën prapa një propagande mediale të paparë më herët duke e kamufluar paaftësisë e tij minimale për të menaxhuar me ndërmarrjet publike”.

Përpos Ferizajt, edhe komunat e Kaçanikut dhe Shtimes marrin shërbime nga kompania “Pastërtia”.