Aktakuzë ndaj dy serbëve për huliganizëm në veri, Prokuroria: Tentuan ta pengojnë vendosjen e rendit Kushtetutues

Prokuroria Speciale e Kosovës ka njoftuar se ka ngritur aktakuzë ndaj dy personave të nacionalitetit serb për veprën “pjesëmarrje në turmë që kryen vepër penale dhe huliganizëm”.

Sipas njoftimit, ka dyshim të bazuar se R.P dh D.O, me të pandehur të tjerë serbë nga Kosova dhe Serbia “kanë marrë pjesë aktive në grupin përkatësisht turmën e personave me qëllim të kryerjes së veprave penale serioze, përmes përdorimit të dhunës kanë tentuar që të pengojnë vendosjen e rendit kushtetues të Republikës së Kosovës në komunat veriore të vendit”.

“Me këto veprime të pandehurit R.P dhe D.O. akuzohen për  veprën penale ‘’Pjesëmarrja në turmë që kryen vepër penale dhe huliganizmi”, nga neni 404 paragrafi  1 lidhur me nenin 31 të Kodit Penal të Republikës së Kosovës”, thuhet në njoftim.

Në afërsi të komunave veriore, në maj të vitit të kaluar kishte kulmuar tensionimi i situatës me dhunën e shprehur ndaj pjesëtarëve të KFOR-it, por edhe ndaj gazetarëve e përfaqësuesve tjerë të medias.