KEDS-i bën thirrje për kursim të energjisë, pesë komuna me probleme

Kompania Kosovare për Distribuim me Energji Elektrike në Kosovë (KEDS), ka njoftuar se janë përfunduar të gjitha parapërgatitjet për të siguruar energjinë elektrike gjatë festave të fundvitit.

Sipas njoftimit, pjesë e planit të këtij vitit është realizimi i afro 280 projekteve për përmirësimin e rrjetit elektrik, përfshirë mirëmbajtjet e kryera gjatë verës, që kanë synuar rritjen e qëndrueshmërisë së sistemit.

KEDS-i u ka bërë thirrje konsumatorëve të kursejnë energjinë, sidomos për ngrohjen me energji elektrike.

Ata inkurajohen të përdorin alternativa për ngrohje dhe të kontribuojnë në uljen e ngarkesës në rrjet, për të lehtësuar situatën për të gjithë.

Për t’u siguruar që konsumatorët do ë kenë drita gjatë festave, KEDS-i ka angazhuar rreth 1.000 punëtorë dhe 135 makineri, përfshirë automjete të ndryshme dhe makineri të rënda.

Puna e tyre do të mbështetet nga 68 vetura, 31 platforma, 16 makineri të rënda dhe 4 automjete për detektimin e kabllove.

Ndër sfidat kryesore, KEDS-i ka theksuar rajonet të Ferizajt, Gjakovës, Rahovecit, Prizrenit dhe Gjilanit, të cilat janë përballur me mbingarkesa të shkaktuara nga kërkesa e lartë për energji.

Në Malishevë, implementimi i superpërçuesit ka dyfishuar kapacitetet dhe ka përmirësuar situatën krahasuar me vitet e kaluara.

“Aktualisht, sfidë vazhdon të mbeten rajonet të Ferizajt, Gjakovës, Rahovecit, Prizrenit dhe Gjilanit, si pasojë e mbingarkesave të shkaktuara. Në Malishevë, si rezultat i implementimit të superpërçuesit nga KEDS-i, kapacitetet janë dyfishuar dhe situata po qëndron më mirë krahasuar me vitet e kaluara. U bëjmë thirrje të gjithë konsumatorëve që të kursejnë energjinë elektrike kudo që është e mundur. Kujdes të shtuar të kihet me ngrohjen me energji elektrike. Ftojmë konsumatorët që nëse kanë alternativa të tjera për ngrohje, t’i përdorin ato”, thuhet në njoftim.