Kurti e pret Walkerin në Qeveri në një takim miqësor, ZKM tregon çka folën

Në prag të 25-vjetorit të Masakrës së Reçakut, kryeministri Albin Kurti e ka pritur në një takim miqësor, ambasadorin William Walker, ish-shefin e misionit të OSBE-së në Kosovë gjatë luftës.

Kurti e ka falënderuar ish-diplomatin amerikan për “kontributin e tij të pazëvendësueshëm gjatë kohës së luftës dhe jehonën që i dha masakrës së Reçakut në rrafshin ndërkombëtar, duke përshkruar ndodhinë në Reҫak si masakër dhe krim kundër njerëzimit”.

“Rikujtuan vitet 1998 dhe 1999, kur ambasadori William Walker ishte në Kosovë në krye të Misionit Verifikues të OSBE-së, që kishte për mision të verifikonte nëse forcat serbe po vepronin në përputhje me marrëveshjen e tetorit të Kombeve të Bashkuara, për të tërhequr forcat e armatosura dhe për të respektuar armëpushimin”, thuhet në komunikatën e lëshuar nga Zyra e Kryeministrit.

Walker, siç njofton ZKM, tha se ndjehet i lumtur dhe krenar për atë që Kosova ka arritur në një periudhë të shkurtër kohore, duke u bërë një nga shtetet më demokratike në Europë. “Ai tha se sa herë që vjen në Kosovë u gëzohet ndryshimeve që i sheh teksa lëvizë nëpër rrugët e Kosovës” sipas ZKM-së.

“Bashkë me urimet për jetë të gjatë dhe shëndet të mirë, Kryeministri Kurti ritheksoi mirënjohjen ndaj Ambasadorit Walker, për rolin e tij korrekt, konkret dhe aq human të treguar në raport me krimet e luftës që Serbia ka kryer ndaj shqiptarëve të Kosovës”, njofton ZKM.