Fermerët gjermanë ngasin qindra traktorë në Berlin për të protestuar kundër qeverisë

Fermerët gjermanë kanë bllokuar rrugët e Berlinit me mbi 3000 traktorë të hënën për të protestuar ndaj planeve të qeverisë për të hequr lehtësimin e taksave për naftën bujqësore.

Joachim Rukwied, president i Shoqatës Gjermane të Fermerëve, tha se ata nuk do të pranojnë ofertën e fundit të qeverisë për të hequr gradualisht lehtësimet tatimore dhe do të vazhdojnë protestat e tyre.

“Kam përshtypjen se qeveria e koalicionit ende nuk e ka kuptuar: ne nuk do të pranojmë kompromise të këqija për naftën bujqësore,” tha ai në një deklaratë.

“Ne kemi nevojë për një ndryshim në politikë që prioritizon nevojat e popullatës sonë, ndërmarrjeve të vogla dhe të mesme, ekonomisë dhe bujqësisë,” shtoi ai.

Që nga mëngjesi i hershëm, kolonat e traktorëve e bllokuan trafikun në Berlin dhe rrugët kryesore të qytetit në rrethin qeveritar dhe rreth portës së Brandenburgut të qytetit u bllokuan.

Disa nga fermerët vendosën në traktorët dhe kamionët e tyre tabela ku shkruhej: “Nuk ka të ardhme pa fermerë”, “Fermat janë në flakë, politikanët janë në gjumë”, “Nuk duhet të luani me ushqimin, siguroni prodhimin bujqësor” dhe “Ndaloni së shpërdoruari paratë e taksapaguesve!”

Koalicioni i majtë-liberal i kancelarit Olaf Scholz njoftoi muajin e kaluar se po planifikon të shkurtojë subvencionet për karburantet bujqësore dhe automjetet, si pjesë e masave të reja shtrënguese të qeverisë për të përmbushur rregullat e buxhetit.

Mes presionit, qeveria rishikoi planin e saj në fillim të këtij muaji dhe tha se lehtësimi i taksave do të hiqet gradualisht gjatë shumë viteve. Por shoqata e fermerëve e hodhi poshtë këtë ofertë, duke theksuar se këto ndryshime nuk ishin aspak të mjaftueshme për të adresuar problemet e tyre./AA