3 orë më parëBesnik Bislimi sulmon ashpër Gjykatën Kushtetuese nga mediumi serb “Radio Gorazdevac”
Periskopi(2 vite më parë)
(2 vite më parë)Nuk janë kredibilë; nuk janë kompetentë; e shohim çdo ditë jokredibilitetin dhe jokompetencën e tyre; vendimet e tyre produkt i një mjedisi të korruptuar; nxjerrin vendime kontraverze; kur nuk i shërbejnë drejtësisë s’veprojmë në bazë të tyre; Qeveria rezervon të drejtën për t’i interpretuar vendimet e tyre. Krejt këto, përmbledhtazi, i tha askush më pak […]
Krejt këto, përmbledhtazi, i tha askush më pak se njeriu i dytë në Qeverinë e Kosovës, Besnik Bislimi – për institucionin më të lartë dhe kyç të vendit në mirëmbajtjen e parimeve dhe rendit kushtetues, Gjykatën Kushtetuese; vendimet e të cilës janë finale.
Njëjtë si shefi i tij, Albin Kurti, që para as mëse as një viti shprehej se “një nëntë gjykatës” kushtetuese nuk mund të pengojnë një dikë që ka marrë “400 mijë vota”, Besnik Bislimi, duke folur për një media serbe “Radio Gorazdevac” goditi ashpër institucionin e Gjykatës Kushtetuese duke i quajtur “jo kredibilë” dhe “jo kompetentë” dhe për më tepër – ndonëse vendimet e kushtetueses duhet të pranohen dhe shihen si interpretimi final i kushtetuetshmërisë – Bislimi tha se “ne si qeveri rezervojmë të drejtën e intepretimit” dhe se “kurdo që Qeveria beson se po i keqshërbejnë drejtësisë atëherë është e vështirë të veprojmë në pajtim me këso vendime”.
Krejt kjo – në mënyrë të çoroditur sigurisht sepse katër-pesë minutë më heret shprehej se draft-Statutin e Asociacionit “do ta dërgojmë në kushtetuese” – erdhi kur u pyet për moszbatimin e vendimit të kushtetueses rreth pronave të Manastirit të Deçanit.
“Gjykata jonë Kushtetuese është e njohur në prodhimin e dokumenteve/vendimeve kontraverze; dhe këtë e shohim në baza ditore sepse besojmë që atyre u mungon kompetenca dhe kredibiliteti. Dhe ky s’është i vetmi vendim i kushtetues që s’ka mundur të gjejë zbatim”, ka thënë Besnik Bislimi.
Bislimi, duke i qëndruar kësaj linje sulmi ndaj Gjykatës Kushtetuese, tha se edhe Qeveria e Kosovës i ka fituar zgjedhjet me premtim për “Drejtësi”.
“Pra, kurdo që Qeveria beson se po i keqshërbejnë drejtësisë atëherë është e vështirë të veprojmë në pajtim me këso vendime. Është vështirë të veprojmë në bazë të tyre. Nuk është se po i mohojmë”.
“Por, nëse puna ime, nëse premtimi im ndaj qytetarëve është që t’u jap drejtësi – kur e dimë që vendimi i Gjykatës Kushtetuese është produkt i një mjedisi të korruptuar – më e pakta që mund të bëjë është të them se ky vendim, në mendimin tim nuk është produkt i një institucioni kredibil”, ka vazhduar Bislimi.
Këtu ai vazhdoi duke nxjerrur një krahasim – pothuajse në nivel fetishi – me Presidentin e Serbisë, Aleksandar Vuçiq.
“P.sh Aleksandar Vuçiq në Bruksel merr rolin e Gjykatës Kushtetuese dhe thotë ‘kjo është në linjë me kushtetutën tme, kjo nuk eshte’; e kjo është tjetri ekstrem. Ne s’e marrim atë rol të GJK-së, por rezervojmë të drejtën për të interpretuar këso vendime të këtilla”, shtoi ai.
Bislimi, megjithatë, njoftoi se draft-Statuti i Asociacionit të Komunave të banuara me shumicë serbe do t’i nënshtrohet rishikimit kushtetues në Gjykatën Kushtetuese – ndonëse ia mohoi kompetencën dhe kredibilitetin.
“Katër faza janë deri të Asociacioni– e para pranimi i draft-Statutit, e dyta është vendimi i GJK-së, pastaj vendimi i Qeverisë, e katërta është procesi i themelimit – në krejt këto katër faza Serbia duhet të jep elementet e njohjes de-facto”, shtoi ai.
“Në momentin kur të jemi gati për themelimin e Asociacionit, ose çfarëdo emri që do t’i japim Serbia duhet ta ketë të kompletuar njohjen de-facto të Kosovës. Ky është pozicioni i të gjithëve, përfshirë edhe Serbisë. Atë se çka thonë publikisht është veçse për konsum të brendshëm; por atë që thonë në Bruksel thonë do ta njohim plotësisht de fakto Kosovën…Në perspektivën e tyre vendimi i parë që duhet të bëjnë është njohja e të gjitha dokumenteve, pasaportave, të gjitha çka institucionet kosovare prodhojnë në momentim kur ne pranojmë draft-Statutin”, tha mes tjerash ai.
