Arrestimi i Dakajt në Serbi, avokati: Duhet t’i themi stop Serbisë sepse nuk keni juridiksion për ta bërë këtë

Smakiqi ka thënë se Dakaj është keqtrajtuar dhe fyer psikologjikisht që nga koha kur është në paraburgim.

“Trajtimi i tij nuk është dinjitoz, përkundër faktit që ai është arrestuar gabimisht sepse nuk është identifikuar dyshimi apo personi që po kërkon prokuroria e Serbisë”, ka thënë Smakiqi.

Avokati ka thënë se duhet t’i themi stop Serbisë sepse sipas tij, shteti në fjalë nuk ka juridiksion për të këso arrestimesh.

Andaj, pasi Kosova ka themeluar Gjykatën Speciale janë tepër i dëshpruar me reagimin e Qeverisë dhe MPJD-së, sepse Kosova duhet t’i thotë bashkësisë ndërkombëtare se juridiksioni për t’i ndjekur pjesëtarët e UÇK-së e ka Zyra e Prokurorit Special në Hagë. Sepse të gjithë e dimë që këtë gjykatë e ka kërkuar edhe Serbia përmes raportit të Dick Marty-t, dhe tani i kemi krerët e UÇK-së duke u gjykuar atje, dhe duhet t’i themi stop Serbisë sepse nuk keni juridiksion”, ka thënë tutje ai.

Smakiqi ka shtuar se arrestimi i ish-ushtarit të UÇK-së është politik, duke shtuar se ky nuk është një rast juridik por një ndalim politik.

“Të ketë vetë pak standarde nga ana e Gjykatës në Beograd, ai do të lirohej menjëherë”, është shprehur ai.

Smakiqi ka shtuar se janë të rrezikuar të gjithë qytetarët e Republikës së Kosovës sepse, sipas tij, prokuroria e Serbisë po vepron me shënimet dhe të dhënat e UDB-së së vitit 1999, të cilat janë të njëanshme dhe që nuk pritet drejtësi nga to.

Ish-pjesëtari i Ushtrisë Çlirimtare të Kosovës, Hasan Dakaj u arrestua më 5 janar të këtij viti, në pikën kufitare në Merdarë.