Spahiu: Sot u rrezikua ose karriera e Kurtit ose ajo e Lajçakut

Kryeministri i Kosovës, Albin Kurti, akuzoi ndërmjetësin evropian të dialogut për normalizimin e raporteve me Serbinë, se është “pozicionuar” kundër Kosovës.

Lidhur me këto akuza, analisti Nexhmetin Spahiu thotë:

“Këto akuza cojnë peshë sepse rrezikojnë karrierën ose të Kurtit ose të Lajçakut. Kurti ka pozicion të fortë sepse e drejta është në anën e tij.

Arsyeja është e thjeshtë, kur ti bën një kontratë të punës, pjesa jote është me pagu punën ai tjetri me punu.

Marrëveshja franko-gjermane është marrëveshje ku Serbia merr autonomi më të madhe e Kosova merr njohjen”, përcjell Periskopi.

Gjatë një konference për media, Kurti  tha se në rundin e fundit të dialogut, ai “pati një pozicionim të qartë të ndërmjetësit kundër Kosovës në përgjithësi, kundër Marrëveshjes [drejt normalizimit të raporteve] në veçanti”, duke iu referuar të dërguarit të posaçëm të BE-së për dialogun, Mirosllav Lajçak.

Kurti tha se dukej që kishte një koordinim mes presidentit të Serbisë, Aleksandar Vuçiq, dhe Lajçakut për, siç tha ai, krijimin e një “skenari alternativ, ku gjysma e marrëveshjes zbatohet”.

“Ditëve në vijim me siguri që unë do të kem takime me të gjithë faktorët ndërkombëtarë, të cilët kanë pranuar shtetin e Kosovës dhe të cilët dëshirojnë të na ndihmojnë, e të na përkrahin sa i përket shtetndërtimit demokratik, zhvillimit socio-ekonomik, por edhe sa i përket njohjeve ndërkombëtare, e në veçanti normalizimit të marrëdhënieve me Serbinë, e që tash e kemi zgjidhjen: është Marrëveshja Bazike e njohjes së ndërsjellë de-facto”, tha Kurti.

Rundi i fundit i dialogut në Bruksel, më 14 shtator, ndërmjet presidentit të Serbisë, Aleksandar Vuçiq dhe kryeministrit të Kosovës, Albin Kurti, përfundoi pa përparim në normalizimin e marrëdhënieve./Periskopi