Pa flamur, pa simbole: Kurti takon kryeministrin bullgar në Slloveni

Qeveria e Kosovës përmes një komunikatë për media ka njoftuar se kryeministri Albin Kurti e ka takuar kryeministrin e Bullgarisë, Nikolai Denkov.

Në komunikatën e ZKM-së thuhet se Kurti e ka falënderuar Denkovin që shteti bullgar ka mbështetur Kosovën në dekadat e fundit. Megjithatë, takimi i tyre bilateral është zhvilluar pa simbole shtetërore, që në këtë rast rezulton të jetë dështim i protokollit.

Takimi është zhvilluar në margjina të forumit multilateral të Bledit në Slloveni.

Ata kanë folur edhe për tema që kanë të bëjnë me karakter ekonomik.

Kurti e ka ftuar homologun bullgar që ta vizitojë Kosovën.

Komunikata e plotë:

Kryeministri i Kosovës, Kurti dhe Kryeministri i Bullgarisë, Denkov zhvilluan takim bilateral.

Një javë pas darkës së përbashkët në Athinë të ftuar nga Kryeministri i Greqisë, Kyriakos Mitsotakis, këtë herë në kuadër të Forumit të Bledit për Siguri, Kryeministri i Republikës së Kosovës, Albin Kurti zhvilloi një takim dy palësh me Kryeministrin e Bullgarisë, Nikolai Denkov.

Në takimin e parë dy palësh të tyre, kryeministri Kurti e falënderoi kryeministrin Denkov për mbështetjen e vazhdueshme të Bullgarisë ndaj Kosovës që nga vitit 1999 e tutje, të gjitha fazat e shtetndërtimit, dhe përkrahjen në anëtarësimin e Kosovës nëpër organizata ndërkombëtare.

Me homologun e tij bullgar, kryeministri Kurti foli për marrëdhëniet bilaterale ndërmjet dy shteteve dhe optimizimin e potencialit të bashkëpunimit sidomos në fushën e ekonomisë.

Në qershor të këtij viti Oda Ekonomike Kosovë-Bullgari themeloi selinë e saj në Sofje. Numri i investitorëve bullgarë në Kosovës është rreth 135 me fuqi investuese rreth 6 milionë euro të shtrirë në disa sektorë si ai i tregtisë dhe shërbimeve, turizmit, ndërtimtarisë, teknologjisë së informacionit dhe transportit.

Përgjatë takimit, kryeministri Kurti gjithashtu e njoftoi kryeministrin Denkov edhe për progresin ekonomik dhe demokratik, arritjet kryesore të qeverisjes dhe reformat në fushën sundimit të ligjit dhe luftimit të korrupsionit, të cilat janë identifikuar dhe vlerësuar gjerësisht në raporte të besueshme ndërkombëtare.  Ai gjithashtu e ftoi atë për vizitë në Kosovë në një të ardhme të afërt.

Pjesëmarrës në këtë takim ishin edhe Ambasadori i Kosovës në Slloveni, Valdet Sadiku, Kryetarja e Komisionit Parlamentar për Politikë të Jashtme, Arbëresha Kryeziu Hyseni dhe këshilltari politik i Kryeministrit, Jeton Zulfaj.