“Besimi fitohet nëpërmjet veprave”, thotë kongresisti Truner kur pyetet nëse i beson Kurtit

Ai në një intervistë për RTS-në tha se Serbia është prioritet për Uashingtonin.

“Qëllimi im i parë është njohja e marrëdhënieve dypalëshe ndërmjet Serbisë dhe Shteteve të Bashkuara. Ekziston një partneritet midis Gardës Kombëtare të Ohajos dhe Ushtrisë Serbe. Sigurisht, ka çështje të hapura në rajon.

“Kam biseduar me presidentin për Bosnjën, Kosovën, në cilat çështje duhet të fokusohen SHBA-të dhe si mund të kontribuojmë ne”, tha Turner.

Amerikani gjatë kësaj interviste ka theksuar edhe punën e përbashkët të bashkësisë ndërkombëtare në gjetjen e një zgjidhjeje për Kosovën.

“Mendoj se gjëja më e rëndësishme është që bashkësia ndërkombëtare të punojë së bashku, si BE-ja dhe SHBA-ja, dhe të sigurohemi që partnerët tanë të gjejnë një zgjidhje së bashku, dhe kjo është ajo që Amerika do të vazhdojë të bëjë. Udhëtimi im këtu nuk ka të bëjë me Kosovën. Udhëtimi im ka të bëjë me rajonin”.

Tutje, në këtë intervistë kongresmeni Turner u pyet se nëse ai beson kryeministrit Kurti kur thotë se ai do të përmbushë diçka.

“Është e qartë se besueshmëria fitohet përmes veprave. Dhe sipas mënyrës që i sheh gjërat ambasadori Hill, është se ne e mbështesim dialogun e ndërmjetësuar nga BE-ja dhe përpjekjet e tyre për të gjetur një zgjidhje së bashku. Sigurisht që ka një numër dispozitash që duhen zbatuar dhe mendoj se, siç edhe thatë ju, kjo është çështje besueshmërie.” – tha ai për mediumin serb.