Ligji për skemat pensionale, Gashi: Vendimi i Kuvendit është i vonuar

Ligji aktual për skemat pensionale parasheh të drejtën e përfitimit nga pensioni kontribut-pagues vetëm për ata persona që dëshmojnë se kanë kontribuar për 15 vjet në ish-Fondin Pensional. Për personat që u larguan dhunshëm nga puna nga regjimi i atëhershëm serb, nuk u mundësua që të gëzonin pensionin kontribut-pagues, për shkak se nuk përmbushnin kriterin prej 15 vjetësh përvojë pune.

Njazi Gashi nga Shoqata e Pensionistëve të Kosovës ka thënë se vendimi i sotëm i Kuvendit është i vonuar përkundër faktit që edhe Gjykata Kushtetuese ka paraparë që ky të realizohet më 15 korrik.

“Është bërë një shkelje dhe ne nuk kemi të dhëna lidhur me këtë draftligj që është miratuar sot në seancën e Kuvendit të Kosovës. Me që në ligjin për skemat pensionale të ligjit pararendës të këtij ligji ka pasur lëshime të mëdha në të cilat ne kemi pasur vërejtje dhe kemi bërë kërkesë që të jemi pjesë e Komisionit për hartimin e këtij draft-ligji, ne nuk jemi konsultuar, nuk na kanë ftuar dhe thjeshtë na kanë servuar diçka që duhet të presim të shohim se çfarë na ofrohet”, tha Gashi në RTK.

Gashi ka parajmëruar se nëse prolongohet më tej  ky vendim, ata do të ankohen nëpërmjet rrugëve ligjore dhe edhe nëse kjo nuk realizohet do të organizojnë edhe protesta.

“Nëse edhe kjo nuk realizohet ne do të kërkojmë mbrojtjen e instancave ndërkombëtare, sepse me të vërtetë ka humbur çdo kuptim dhe çdo rezervë e durimit tonë për këto padrejtësi që po na bëhen me vite të tëra”, ka thënë ai.

Duke komentuar futjen në skemë të të gjithë qytetarëve të cilët janë larguar nga puna në vitet e ‘90, e të cilëve nuk u është njohur kontributi, dhe si pasojë, nuk e kanë plotësuar kriterin prej 15 vjetësh stazh, për të përfituar nga pensioni kontribut-pagues, Gashi ka theksuar se kjo kategori është e diskriminuar.

“Një numër shumë i madh i atyre të punësuarve në atë kohë në mënyrë të paligjshme janë larguar nga puna dhe ata kanë qenë njëherë të penalizuar, e tani po penalizohen për herë të dytë sepse po ju mungojnë disa vite dhe ky është kompensim parcial dhe jo gjithëpërfshirës”, tha Njazi Gashi nga Shoqata e Pensionistëve të Kosovës.

Ai tha se numri përfitues nga skemat pensionale llogaritet të jetë mes shtatë mijë deri në dhjetë mijë pensionistë të cilët nuk e kanë plotësuar kushtin prej 15 vitesh dhe ata do të përfitojnë.

“Por është një numër i madh i atyre që tani nuk janë më në jetë dhe nuk e dimë se çfarë do të ndodhë me ata që iu është mohuar e drejta me vite të tëra dhe a do të fillojë kompensimi prej kur kanë dalë njerëzit në pension, apo do të fillojë ekzekutimi i vendimit pas miratimit të këtij ligji”, tha Gashi.

Sipas vlerësimeve të Qeverisë së Kosovës, aktualisht, në skemën e pensionit bazik duhet të jenë rreth 70.000 persona që realisht do të duhej të kualifikoheshin për pensionin parcial kontributpagues të moshës. Kjo skemë e re pensionale për personat që u larguan nga puna në vitet ’90 llogaritet se do t’i kushtojë shtetit rreth 60 milionë euro në vit.