Molliqaj: Kurti është i rrezikshëm, e kemi parashikuar në 2017-2018 rrezikun e tij

Ai i ka përmendur disa nga ndryshimet e partisë në pushtet.

Në një intervistë për Front Online, Molliqaj ka thënë se po dalin parashikimet e tyre në kohën kur u larguan nga Vetëvendosja se Albin Kurti është i rrezikshëm dhe se pushtetin e vetëm që e ka në parti tani po e implementon edhe në shtet.

“S’ka shans me qenë VV-ja si më herët, ka ndryshuar edhe kur kam qenë unë pjesë e tyre. Njëra prej ndryshimeve më të mëdha ka qenë në vitin 2017-2018 kur ka ndodh ndarja dhe ajo ka lënë shenja të thella në veprimtarinë e saj. Aty ka ndodhë një zhvendosje e koncentrimit të pushtetit te lideri i saj, tani jemi në një fazë ku ai po e implementon pushtetin e vetëm që e ka jo vetëm në parti por edhe në shtet dhe vlen ajo fraza jonë që Albin Kurti është i rrezikshëm dhe ja cili është rreziku i Kurtit këtë e kemi parashikuar qysh në atë vit dhe kemi thënë që nëse një qasje e tillë e ka brenda partisë të njëjtën e ka edhe në shtet”, përfundoi Molliqaj.

Dardan Molliqaj kishte dhënë dorëheqje nga pozicioni i Sekretarit organizativ të Lëvizjes Vetëvendosje me 19 korrik të 2017.

Bashkësia ndërkombëtare i ka paraqitur Kurtit tri kërkesa kryesore: qetësimin e situatës në veri, mbajtjen e zgjedhjeve të reja në katër komunat veriore dhe rikthimin në dialogun për normalizimin e raporteve Kosovë-Serbi.

Ndërkaq, nga Beogradi është kërkuar që të sigurojë që serbët të marrin pjesë pa kushte në zgjedhjet eventuale lokale.

Kurti ka paraqitur një plan prej pesë pikash që parasheh edhe mbajtjen e zgjedhjeve të reja, por për mbajtjen e tyre, ai ka thënë se nevojitet shtet ligjor.

Qeveria i është kundërpërgjigjur BE-së, zyrtarë të së cilit një ditë më parë specifikuan masat ndëshkuese që mund të merren ndaj Kosovës për situatën në veri. Ekzekutivi i ka thënë televizionit Dukagjini se është e vështirë të arsyetohet se si BE-ja ndërmerr masa negative ndaj Kosovës, të cilën më parë e ka vlerësuar pozitivisht për progresin e saj.