Tahiri: Mbi 80 mijë njerëz janë viktimë e eksperimenteve të Qeverisë

Lajmin e ka bërë të ditur shefi i Grupit Parlamentar të kësaj partie, Besnik Tahiri. Ai më këtë rast ka kërkuar rishikim të buxhetit të Republikës së Kosovës dhe rritja e pagave në sektorin publik.

Sipas tij, ekonomi është buzë kolapsit si dhe qytetarët janë të shtyrë që ta lëshojnë vendin.

“Ndërhyrja e Qeverisë në strukturën e të hyrave dhe të shpenzimeve buxhetore ka qenë shumë e dëmshme në rrjedhat e zhvillimit në vend duke i ngritur normat e tatimit në njërën anë, e në anën tjetër duke i bllokuar investimet kapitale. Vetëm për dy vjet qeverisje janë bllokuar rreth 500 milionë euro të investimeve kapitale, me çka është dëmtuar ekonomia e vendit për rreth 200 milionë euro si pasojë e inflacionit dhe vonesës se investimeve kapitale”.

“Çështja e dytë lidhet me sektorin publik, ka një kohë që Qeveria flet për Ligjin e pagave. Mbi 80 mijë njerëz janë viktimë e eksperimenteve të Qeverisë. Me cilindo zyrtar publik që takohesh ka zhgënjim” – tha shefi i grupit parlamentar të AAK-së.

“Gjendja e rëndë socio–ekonomike në vend, e krijuar nga niveli i lartë i inflacionit, rritja e çmimeve të konsumit, shtrenjtimi i çmimit të energjisë dhe vendimi për rritjen e tatimit në pronë, ka bërë që  qytetarët të përballen me vështirësi të shumta”.

“Rritja e pagave në sektorin publik do të ishte zgjidhje që do të lehtësonte sado pak këtë situatë, pasi kjo është kërkesë e kohës. Kjo rritje do të duhej të ndodhte menjëherë me rishikimin buxhetor dhe kjo do të ndikonte në rritjen e konsumit të përgjithshëm por edhe indirekt në rritjen e pagave në sektorin privat. Nëse ky veprim nuk ndodh menjëherë, Kosova rrezikon të zbrazet dhe të mbes pa shumë profesionistë të zotë”./eo/