Shefja e ShSKUK-së thotë se ka mjaftueshëm barna e penj

Ajo tha se ndonëse furnizimi nuk është 100 për qind, është dukshëm më mirë edhe për sa i përket materialit shpenzues.

“Për sa i përket materialit shpenzues, kemi. Kemi penj, një lloj i perit ka munguar por edhe me të jemi plotësuar”.

“Cështja e prokurimit, ajo e vonesave të planifikimeve janë arsye për mungesën e barnave esenciale. Ndonjëherë dështon procesi i prokurimit, presim përgjigje nga OShP-ja e këto janë ato që na vështirësojnë furnizimin”, tha ajo për Klan Kosova.

Tutje, ajo tha se arsyeja e vonesave nganjëherë është edhe tek “operatorët e papërgjegjshëm”.

“Nganjëherë kemi edhe operatorë të papërgjegjshëm, por megjithatë bashkë me Zyrën e Prokurimit i kemi ndenjur gati që furnizimi të kryhet me kohë”, tha ajo.

Infeksionet intra spitalore janë problem me të cilat përballet shëndetësia kosovare.

Njëri nga faktorët që i atribuohet infeksioneve me të cilat mund të përballen pacientët pasi dalin nga spitali, por edhe pas intervenimeve kirurgjike, është infrastruktura.

Por, jo vetëm kjo.

Shkak tjetër që mund t’i transmetojë infeksionet janë edhe zgjatja e thonjëve artificialë, apo edhe aksesorët e tjerë që i bartin stafi shëndetësor duke punuar.

Narqize Arënliu-Hoxhaj, tha se ka pasur pakënaqësi lidhur me këto.

“Jemi në diskutim për të marrë masa në lidhje me këto çështje”, tha Arënliu – Hoxhaj në Klan Kosova.

Ajo theksoi se po planifikohet që disa prej klinikave të QKUK-së të rinovohen në mënyrë që të përmirësohen kushtet e trajtimit për pacientët.