Osmani thotë se ekziston vullneti për një tranzicion energjetik në Kosovë

“Kosova e kupton mirë rëndësinë e luajtjes së një roli aktiv në këtë betejë ekzistenciale. Përmes Këshillit Kombëtar për Ndryshimet Klimatike, institucionet e Kosovës kanë bashkuar forcat për të identifikuar skenarët që na ndihmojnë në përpjekjet tona për të luftuar ndryshimet klimatike”, tha ajo, raporton RTKlive.

Sipas saj në përputhje me kërkesat e Sekretariatit të Komunitetit të Energjisë – një organ që lehtëson pajtueshmërinë e ligjeve tona për energjinë dhe klimën me ato të BE-së, Kosova tani po punon drejt finalizimit të Planit të saj Kombëtar të Energjisë dhe Klimës 2025-2030.

“Ndërsa jemi duke kërkuar për modalitetet për t’iu bashkuar Marrëveshjes së Parisit edhe pse nuk jemi anëtare e OKB-së, ne jemi të vetëdijshëm për domosdoshmërinë e krijimit të parakushteve adekuate. Prandaj, tani jemi në proces të finalizimit të Ligjit të parë për Ndryshimet Klimatike në vendin tonë”, tha ajo.

Duke shtuar se aleancat më të forta ndërtohen në bazë të vlerave të përbashkëta. “Ndërsa kërkojnë të kenë sukses në këtë sipërmarrje madhore, aleancat kthehen në një faktor përcaktues. Vitin e kaluar, në bisedimet me një mik të dashur të Kosovës, ish-sekretarin John Kerry, aktualisht i dërguari i posaçëm presidencial i SHBA-së për Ndryshimet Klimatike, diskutuam përfitimet e anëtarësimit të Kosovës në Betimin Global të Metanit. Jam i lumtur të raportoj si rezultat i përkushtimit të institucioneve tona dhe partneritetit tonë shembullor me SHBA-në, Kosova i është bashkuar zyrtarisht grupit të vendeve që angazhohen për të frenuar emetimet e metanit – tani e konsideruar gjerësisht si mënyra e vetme më e shpejtë dhe më efektive për të kufizuar ngrohjen”, tha ajo.

Osmani ka folur edhe për rezervat që Kosova të thëngjillit. “Ndërsa flas për atë që po bën vendi im, besoj se duhet të jap edhe një kontekst më shumë për të krijuar një pamje më të qartë për të gjithë. Duke qenë rezerva e 5-të më e madhe e linjitit në botë, natyrisht sistemi ynë energjetik ka qenë historikisht shumë i varur nga prodhimi i energjisë me bazë linjiti. Fatkeqësisht, kjo varësi e fortë e linjitit vazhdon edhe sot e kësaj dite, por tani kemi arritur në një pikë ulje. Ne jemi të vetëdijshëm se vendimet që merren sot kanë fuqinë për të krijuar në planin afatgjatë jetën, shëndetin, ekonominë dhe mjedisin tonë”, tha ajo.

Sipas të parës së shtetit, ulja e përdorimit të qymyrit, konsiston në investime në energjinë e rinovueshme, në efiçencën e energjisë dhe në ekonominë rrethore.

“Së shpejti do të jemi vendi pritës i projektit më të madh të kapacitetit të ruajtjes së baterive të mbështetur nga Korporata e Sfidës së Mijëvjeçarit, si dhe projekti i parë në Ballkan për ngrohje qendrore me panele diellore. Por ka potencial për shumë më tepër dhe sigurisht ka shumë hapësirë për projekte dhe zgjidhje inovative”, tha ajo.

E para e vendit tha se ekziston vullneti për t’u angazhuar në një tranzicion të gjelbër për të fuqizuar më tej idenë e një Kosove më të gjelbër, ne të gjithë e dimë se duhet shumë më tepër se kaq për të fituar rastin realisht.

“Një tranzicion energjetik, një tranzicion i fuqishëm sipas nevojës në Kosovë, vjen me kosto sociale, implikime financiare, ai kërkon libra të rinj politikash dhe një mentalitet të komunitetit që përqafon ndryshimin. Ne kemi ekspertizën tonë lokale, një kombinim i të dyjave mund ta vendosë Kosovën në rrugën e saj drejt një të ardhmeje neto zero deri në vitin 2050, nëse jo më herët”, tha presidenjta Osmani.