Avokati që pagoi 30 euro postën në VisaMetric kërkon që t’i kthehen paratë atij dhe qytetarëve

Ai kishte kërkuar që shërbimi postar në vlerë prej 30 eurosh të mos jetë obligator për aplikantët për viza në Ambasadën Gjermane.

Avokati tashmë po kërkon që t’u kthehen paratë të gjithë atyre që kanë paguar për këtë shërbim pasi që Gjykata Komerciale, në të dyja shkallët ka vendosur që VisaMetric-ut, t’ia ndalojë detyrimin që aplikantët të pranojnë pasaportat vetëm përmes postës,.

Më tutje Avokati Abdullahu konsideron se ky operator ekonomik nuk po e respekton vendimin e gjykatës dhe po vazhdon sërish t’iu marrë para qytetarëve, pasi vlerëson se kjo praktikë është dashur të ndalohej së zbatuari prej “kur është nxjerrë vendimi i shkallës së parë”.

Në një prononcim për lajmi.net ka shpjeguar se si nisi procedurat që të ndalohet praktika e pagesës për të pranuar pasaportën vetëm përmes postës dhe të mos ekzistojë mundësia që mjeti i identifikimit të tërhiqet direkt nga zyra.

Ai tha se kjo nisi kur ka aplikuar në shtatorin e vitit 2022 për vizë.

“Unë kam aplikuar për vizë edhe në momentin kur e kam pa qysh është praktika e atyre njerëzve, kam bë ankesë në Departamentin për Mbrojtjen e Konsumatorit në Ministrinë e Tregtisë dhe Industrisë. Ata (VisaMetric) e kanë pas detyrimin e postës pasi që ke shkuar me apliku, unë kam bë ankesë edhe ka shkuar Inspektori i Mbrojtjes së Konsumatorit, ata i kanë thanë Inspektorit, se kush aplikon me familje nuk ia marrim për 5 anëtarë pagesën, por ia marrim për një, tash e tutje. Edhe atyre që ju kemi marrë nga 1 Tetori, kemi me jua kthy. Nuk është e vërtetë që i kanë kthy ata vazhdojnë me i marrë (paratë), por e kanë kthyer formën avans. Në momentin kur t’i e bën terminin ata të marrin avans edhe për postën… 30 euro shërbimi për postën”, u shpreh avokati për lajmi.net

Avokati Abdullahu deklaron se nëse një familje 5 anëtarëshe ka aplikuar për viza, postën është dashur ta paguajnë 150 euro.

“Në fillim ka qenë postën me pagu aty cash, më pastaj kur ju ka shku në kontroll Mbrojtja e Konsumatorit e kanë bë pagesën avans. Mos me mujtë me bë termin, pa e paguar postën. Kanë vazhduar me apliku, p.sh, e njëjta familje, e njëjta adresë, për 5 veta ia kanë marrë 150 euro vetëm për postë”, tha avokati Abdullahu.

Në mënyrë që atij dhe qytetarëve t’u kthehen paratë, avokati tha se ka ushtruar Padi Kolektive, në emër të interesit publik.

I njëjti shtoi se vendimi për ndalimin e pagesës prej 30 euro, është dashur të zbatohej nga VisaMetric L.L.C që nga marrja e vendimit të gjykatës së shkallës së parë.