Pacolli për marrëveshjen në Ohër: Është në dëm të Kosovës, koston do ta paguajmë më vonë

Anipse pala serbe refuzoi ta nënshkruajë zyrtarisht marrëveshjen, dy palët ranë dakord që zbatimi i saj të fillojë sa më shpejt.

Për takimin e 18 marsit dhe arritjen e ujdis mes dy shteteve, për Front Online ka folur ish-ministri i Punëve të Jashtme, Behgjet Pacolli.

Pacolli krejt këtë marrëveshje të arritur po e vlerëson si dëm për Kosovën.

Ai thotë se koston e kësaj ujdie, vendi ynë do ta paguaj.

“Kurti iu bind presionit ndërkombëtar, pse dhe si duhet të marrim videot e qëndrimeve të tij se kujt mund t’i bëhet presion për të kuptuar situatën e tij politike. Por ai e ka dëmtuar vendin me këtë marrëveshje, koston e së cilës do ta paguajmë më vonë”, u shpreh Pacolli për Front Online.

Pacolli: Kosova dhe Serbia nënshkruan marrëveshje për të krijuar mosmarrëveshje të reja

Ish-ministri, Behgjet Pacolli tha se arritja e marrëveshjes në Ohër, është pika më e dobët e Kosovës në dialog.

Tutje, Pacolli shtoi se aneksi parashikon obligim për vendin tonë për zbatimin e Asociacionit.

“Si Kosova edhe Serbia arritën një marrëveshje për të krijuar mosmarrëveshje të reja. Kjo është pika më e dobët e Kosovës në procesin e dialogut pasi nuk ka asnjë përfitim të qartë për Kosovën dhe as obligime konkrete për Serbinë, por vetëm për Kosovën aneksi parashikon një obligim të qartë për zbatimin e nenit 7 dhe nenit 10 (të cilët tani janë së bashku në aneks në një paragraf) për vetëmenaxhimin në kuadër të Asociacionit përtej marrëveshjeve të vitit 2013 dhe 2015”, theksoi Pacolli.

Pacolli-Kurtit: Nuk mund të jesh Kryeministër dhe të dalësh kundër aleatëve të vendit

Ish-ministri i Punëve të Jashtme, Behgjet Pacolli ka kritikuar kryeministrin Kurti për qëndrimet e tij karshi politikës.

Pacolli tha për Front Online se transformimi i Kurtit kundrejt Asociacionit, është manipulim.

“Kurti ka ndryshuar qëndrimet e tij për të mbetur në pushtet. Ai e di që nuk mund të jesh kryeministër i Kosovës dhe të dalësh kundër aleatëve të vendit. Thelbi i politikës së tij ka qenë mashtrimi dhe manipulimi për të ardhur në pushtet dhe transformimi i tij politik tani kundrejt Asociacionit, dialogut por edhe ndaj statusit të veçantë për Kishën Ortodokse Serbe”, deklaroi Pacolli për Front Online.

Ajo që ka fituar nga ujdia e arritur në Ohër, sipas Pacollit, është Serbia.

 “Është një fitore për Serbinë pasi ka arritur të heqë njohjen reciproke, të heqë referencën e anëtarësimit në OKB dhe Asociacioni 2.0 do të ketë pushtet ekzekutiv dhe Kisha Ortodokse Serbe do të zyrtarizoj një status që shkon përtej propozimit të Athisaarit i cili parashikon të drejta dhe privilegje për KOS-in dhe jo status të formalizuar”, tha ai për Front Online.

Ish-ministri, Pacolli tha se Kosova nuk do ta përfitojë asgjë nga marrëveshje e arritur me 18 mars.

“Në mes të natës, pa pëlqimin demokratik të Kuvendit, kryeministri Kurti ka rënë dakord kryeveti me presidentin serb Vuçiq për një marrëveshje që do të forcojë ndikimin e Serbisë në Kosovë, por nuk do t’i sjellë asnjë përfitim Kosovës në kuptim të finalizimit të shtetësisë së saj dhe të integrimit ndërkombëtar”, përfundoi Pacolli.

Ndryshe, kryeministri i Kosovës, Albin Kurti, pas marrëveshjes ka deklaruar se me Serbinë është arritur pajtimi publik për një aneks që do të udhëzojë zbatimin e marrëveshjes bazë. Ai tha se në marrëveshjen bazë është njohje e ndërsjellë de-facto.

Ndërsa, presidentja e vendit, Vjosa Osmani ka thënë për marrëveshjen e arritur se Kosova dëshmoi të jetë e vetmja palë në dialog që u tregua konstruktive dhe e interesuar në paqe e stabilitet.