Shtyhet gjykimi ndaj Sinan Vllasaliut për shmangie nga tatimi

Për shkak se mbrojtësi i të akuzuarit Sinan Vllasaliu, avokati Florent Latifaj ishte i angazhuar në tjetër seancë, është shtyrë të mërkurën gjykimi në rastin ku këngëtari Vllasaliu ngarkohet se ka dëmtuar shtetin 24 mijë e 270 euro e 98 centë duke iu shmangur tatimeve gjatë viteve 2011-2015.

Lidhur me mungesën e avokatit Latifaj, gjykatësja Naime Krasniqi-Jashanica tha se i njëjti përmes një shkrese zyrtare, ka njoftuar gjykatën se nuk mund të jetë i pranishëm në këtë seancë për shkak se është i zënë me përfaqësimet e tij në një çështje tjetër, duke kërkuar që seanca e sotme të shtyhet.

Lidhur me këtë, i akuzuari Vllasaliu tha se nuk mund të vazhdohet pa avokatin e tij, raporton “Betimi për Drejtësi”.

Andaj, në mungesë të kushteve ligjore seanca e sotme u shty.

Ndryshe, i akuzuari Vllasaliu ishte deklaruar i pafajshëm në seancën e mbajtur më 18 nëntor 2022.

Sipas aktakuzës së ngritur më 2 maj 2018, nga Prokuroria Themelore në Prishtinë, Sinan Vllasaliu po ngarkohet me veprën penale “Shmangia nga tatimi”.

Aktakuza thotë se i pandehuri Vllasaliu në cilësi të këngëtarit dhe të pronarit të biznesit “N.P.T. “Tusido” me seli në Prishtinë në vazhdimësi për vitet fiskale 2011, 2012, 2013, 2014 dhe 2015 që ndërlidhen me pagesën e tatimit, tarifave apo kontributeve tjera pranë Administratës Tatimore të Kosovës me qëllim të përfitimit të paligjshëm, nuk ka deklaruar apo ka deklaruar pjesërisht qarkullimin real nga aktiviteti i tij ekonomik.

Për këtë veprim, ai ngarkohet se ka dëmtuar buxhetin e Republikës së Kosovës në shumë të përgjithshme në vlerë prej 24 mijë e 270 euro e 98 centë.

Me këtë, ai akuzohet se ka kryer veprën penale “Shmangia nga tatimi” nga neni 313, paragrafi 2 lidhur me paragrafin 1 të Kodit Penal të Republikës së Kosovës, vepër kjo e dënueshme me gjobë dhe me burgim prej gjashtë (6) muaj deri në pesë (5) vjet.