117 mijë euro për bileta të aeroplanit, reagon MAShT-i: Kontrata është nënshkruar javën e kaluar, buxheti nuk ka filluar ende të shpenzohet

Ministria e Arsimit ka reaguar pas raportimeve për shpenzimet që pritet të ketë ministrja Arbërie Nagavci për biletat e aeroplanit, shkruan Periskopi.

Siç sqarohen nga Ministrija buxheti i kontratës së nënshkruar javën e kaluar nuk ka filluar ende të shpenzohet.

”Kontrata është nënshkruar javën e kaluar dhe mundëson realizimin e nevojave për udhëtime zyrtare të të gjithë punëtorëve të MAShTI, universiteteve, instituteve dhe agjencive vartëse të MAShTI për dy vitet e ardhshme. Buxheti i kontratës nuk ka filluar ende të shpenzohet pasi ende nuk ka pasur kërkesa për blerje të biletave”, thuhet ndër të tjera në reagimin e MASHT.

Reagimi i plotë:

Reagim në lidhje me shkrimin e portalit “Gazeta 10” me titull “Air” Nagavci shpenzon 117 mijë euro për bileta të aeroplanit

Ministria e Arsimit, Shkencës, Teknologjisë dhe Inovacionit (MAShTI) reagon ndaj shkrimit të botuar me datë 05.12.2023 në portalin “Gazeta 10” me titull “Air” Nagavci shpenzon 117 mijë euro për bileta të aeroplanit.

Ky shkrim ka pasaktësi dhe të pavërteta duke filluar që nga titulli tendencioz, ku pretendohet se ministrja Nagavci ka shpenzuar 117 mijë euro për bileta të aeroplanit.

Shkrimi i referohet tenderit të hapur nga MAShTI “Shërbime të transportit ajror për stafin e MAShTI” kontratë e cila ende nuk ka nisur të zbatohet.

Kontrata është nënshkruar javën e kaluar dhe mundëson realizimin e nevojave për udhëtime zyrtare të të gjithë punëtorëve të MAShTI, universiteteve, instituteve dhe agjencive vartëse të MAShTI për dy vitet e ardhshme. Buxheti i kontratës nuk ka filluar ende të shpenzohet pasi ende nuk ka pasur kërkesa për blerje të biletave.

Andaj, tendenca e portalit në fjalë që përmes këtij shkrimi të dezinformojë publikun kinse ministrja ka shpenzuar 117 mijë euro për bileta të aeroplanit është e papranueshme. Në lidhje me këtë, MAShTI do t’i drejtohet edhe Komisionit të Pavarur të Mediave.

Me gjithë kërkesat e shumta për qasje në dokumente publike dhe vështirësitë që shkakton te stafi në punën e përditshme realizimi i kërkesave, MAShTI ka qenë gjithmonë i hapur për t’iu përgjigjur medieve dhe qytetarëve, përfshirë edhe shpenzimet e ministres Nagavci.

MAShTI siguron qytetarët se, çdo cent i shpenzuar i buxhetit të Kosovës, është përdorur dhe do të përdoret sipas planifikimit dhe për këtë do të jetë i njoftuar gjithmonë opinioni publik.