Raporti i Progresit: Të ndëshkohen deputetët që mungojnë pa arsye

Raporti i progresit për Kosovën i Komisionit Evropian ka theksuar edhe problemet e funksionimit të Kuvendit të Kosovës, duke thënë se puna në këtë institucion vazhdoi të pengohej nga mungesa e një kuorumi vendimmarrës dhe përpjekjet e kufizuara për të krijuar konsensus ndërpartiak.

Raporti thekson se Kuvendi nuk ka mundur të miratojë ligje dhe të bëjë emërimet e nevojshme në organet publike për periudha të gjata kohore, transmeton lajmi.net.

Ai tutje rekomandon që Kuvendi të prezantojë masa ose ndëshkime për t’u siguruar që mund të kryejë rolin e tij.

“Bojkoti nga deputetët e Listës Serbe e bëri të pamundur miratimin e ligjeve në kategorinë e legjislacionit jetik. Vazhdoi mungesa e konsensusit politik për disa nga reformat kryesore dhe proceset legjislative. Kuvendi duhet të prezantojë masa dhe ndëshkime për t’u siguruar që mund të kryejë rolin e tij. Për këtë qëllim, ajo do të duhet gjithashtu të përmirësojë menaxhimin e saj të brendshëm, të miratojë një plan vjetor pune dhe të prezantojë një sistem votimi elektronik dhe një sistem elektronik të regjistrimit të pranisë. Përveç funksionit legjislativ, Kuvendi duhet të forcojë funksionin e tij mbikëqyrës”, thuhet në raport.

“Mungesa, ardhja me vonesë dhe largimi i hershëm nga seancat plenare dhe mbledhjet e komisioneve janë bërë praktikë e zakonshme. Rregullores së re të Punës i mungojnë masat për vendosjen e gjobave financiare (ose të tjera) për mungesë të pajustifikuar në seancat parlamentare .Më 7 nëntor 2022, 10 deputetë të Listës Srpska dhanë dorëheqje nga Kuvendi si pjesë e tërheqjes kolektive të serbëve të Kosovës nga institucionet e Kosovës. Më 17 nëntor, kandidatët e radhës morën mandatin e tyre. Nëntë deputetë të rinj të Listës Serbe, një anëtar i Nismës Qytetare të opozitës serbe të Kosovës ‘Liri, Drejtësi, Mbijetesë’ (SPO) dhe dy deputetë goranë dhe romë morën pjesë në seancën plenare të 6 prillit 2023 për të siguruar vazhdimin e mandateve të tyre, vetëm për të vazhduar më pas bojkotin e seancave plenare“, thuhet tutje.