65 mijë euro tentohen të futen ilegalisht nga Shqipëria në Kosovë (FOTO)

Dogana e Kosovës njofton se sot në Vërmicë gjatë zhvillimit të operacionit nga njësitë e antikontrabandës dhe njësisë K9 të doganës, është arritur të parandalohet futja ilegale e 65 mijë eurove.

Në hyrje është paraqitur një automjet ne targat të Republikës së Shqipërisë i cili është përzgjedhur për kontroll në vijë të dytë së bashku me policinë.

Bëhet e ditur se gjatë kontrollit të veturës, në pjesën e bagazhit, në vendin e destinuar për pajisjet e ndihmës së parë, është zbuluar një pliko e verdhë e fshehur, e cila përmbante mjete monetare në shumë totale prej 65,000 eurosh.

Rasti është dërguar për hetime, derisa është marrë masa e menjëhershme e konfiskimit të 25% të shumës totale të padeklaruar, në vlerë prej 16 mijë e 250 euro. Pjesa e mbetur, 48 mijë e 750 euro, deponohen deri në përfundim e procedurave të mëtejme.