Policia arreston dy persona për dhunimin e një të miture: Viktima ka thënë se e kanë dhunuar në lokacione të ndryshme

Janë arrestuar dy persona, një grua dhe një burrë për dhunimin e një të miture në Gjakovë.

Lajmin për Periskopin e ka konfirmuar zëdhënësi i Policisë për Rajonin e Gjakovës, Sheremet Elezaj, i cili tha se e mitura ishte abuzuar dhe dhunuar nga persona të panjohur në lokacione të ndryshme.

“Me datën 13.10.2023 rreth orës 09:00 viktima, femër (fëmijë), gjatë dëgjimit policor në prezencën e akterëve të nevojshëm ka treguar se ishte abuzuar dhe dhunuar nga persona të panjohur në lokacione të ndryshme”.

“Lidhur me rastin janë arrestuar dy persona, një femër dhe një mashkull të moshës madhore, mbi dyshimin se janë të përfshirë në rast. Veprimet e nevojshme hetimore janë kryer në koordinim me prokurorin e shtetit, me vendimin e të cilit të dyshuarit janë ndalur në mbajtje si dhe është iniciuar rast “Keqtrajtim apo braktisje e fëmijës” dhe “Dhunim”, thuhet në konfirmim.

Ndërkaq, raportimet bëjnë të ditur se vajza e cila dyshohet se është dhunuar është e moshës 10-vjeçare.