Avokati serb: Radoiçiq do të duhej të përgjigjet për vrasje dhe terrorizëm

Ish-nënkryetari i Listës Serbe, Milan Radoiçiq, i cili mori përgjegjësinë për sulmin terrorist në fshatin Banjskë më 24 shtator, kur u vranë një pjesëtar i Policisë së Kosovës dhe tre anëtarë të grupit terrorist, ka dhënë deklaratë në ministrinë e Brendshme të Serbisë e avokati i tij Goran Petronijeviq pretendon se ai ndoshta mund të mbahet përgjegjës për posedimin e armëve.

Megjithatë, ekspertët ligjorë me të cilët në Serbi mendojnë ndryshe.

Avokati Ivan Niniq i tha Danas se para se prokurori të fillojë të merret me Radoiçiqin, duket se fillimisht duhet të konsultohet me Vuçiqin nëse do të respektojë Kushtetutën e Serbisë apo marrëveshjen e Brukselit, transmeton Telegrafi.

“Nëse ende e konsiderojmë Kosovën pjesë të territorit tonë, atëherë veprimet prokuroriale në procedurën parapenale duhet të mbulojnë një shtrirje shumë më të gjerë sesa armëmbajtja pa leje. Mendoj se çështja parësore këtu është vdekja e katër personave dhe plagosja e disa qytetarëve tanë, e më pas posedimi dhe mbajtja e armëve pa leje”, theksoi Niniq.

Ai shton se nëse “teza e shtetit tonë dhe e prokurorisë është se marrëveshja e Brukselit është mbi Kushtetutën e Serbisë dhe se ne nuk kemi juridiksion në territorin e Kosovës|, atëherë Radoiçiq mund të akuzohet vetëm për armëmbajtje.

“Nuk do të habitesha nëse Vuçiq do të provonte një ndërmjetësim të tillë dhe do ta detyronte Radoiçiqin të lidhë një marrëveshje për pranimin e fajësisë me prokurorinë. Kjo do të thotë se ai duhet të dërgohet menjëherë në burg dhe të përpiqet ta shpëtojë, të paktën përkohësisht. Megjithatë, nuk jam i sigurt se një skenar i tillë do të jetë i pranueshëm për bashkësinë ndërkombëtare përderisa Serbia e bllokon hyrjen e Kosovës në institucionet ndërkombëtare”, shtoi Niniq.

Sipas tij, “kur ti mbron kriminelët, ka çmimin e vet që duhet paguar në fund, dhe ne do ta paguajmë si komb”.

“Për ta shpëtuar Radoiçiqin, Vuçiq ende duhet të dorëzojë diçka konkrete në perëndim dhe në Prishtinë, dhe e pa se si ia kishte kaluar Boris Tadiq me Karaxhiqin dhe Mlladiqin dikur”, thotë Niniq.

Avokati Çedomir Stojkoviq thotë se Goran Petronijeviq nuk e thotë të vërtetën dhe se Milan Radoiçiq është qartazi autor i veprës së armëmbajtjes pa leje dhe lëndëve shpërthyese.

“Në videon e publikuar nga mediat kosovare, shihet qartë se ai mban në dorë një pushkë automatike që civilët nuk lejohen ta mbajnë dhe as ta posedojnë. Sipas nenit 348, paragrafi 4, dënimi për atë vepër penale është prej dy deri në 12 vjet burgim. Po ashtu, sipas nenit 391 të Kodit Penal të Republikës së Serbisë, ky lloj organizimi i një formacioni paraushtarak me armë të rënda konsiderohet terrorizëm, i cili dënohet me burgim nga pesë deri në 15 vjet”, thekson Stojkoviq.

Sipas tij, nuk ka dyshim se sipas ligjeve të Serbisë, ky formacion i armatosur përfaqëson organizatë terroriste, sepse çdo formacion i armatosur që nuk është pjesë e ushtrisë apo policisë serbe, me armë kaq të mëdha dhe të rënda, është terrorist.

Gjithashtu, është e qartë se gjatë aksionit të atij grupi është vrarë një polic i Kosovës dhe sipas nenit 114 paragrafi 1 pika 7, kjo përbën vrasje të rëndë, e cila dënohet me të paktën 10 vjet burgim ose me dënim maksimal me burgim të përjetshëm.

“Organizatori i grupit, nxitësi dhe ndihmësi dënohen njësoj si autori i menjëhershëm”, theksoi Stojkoviq.