Vuçiq pretendon se s’kishte anëtarë të grupit Wagner në barrikadat në veri

“Është gënjeshtër dashakeqe se pjesëtarët e grupit Wagner ishin në barrikadat në Kosovë. Po ashtu, Nuk është e drejtë të ftojmë serbët në luftë në Ukrainë, nuk është e drejtë që ne të vuajmë sepse kemi pranuar çdo person nga Federata Ruse dhe sepse rusishtja është gjuha amtare këtu dhe sepse ne nuk kemi vendosur sanksione. Nëse e bënim këtë, do të ishte kundër rregulloreve tona”, tha ai.

Kurse kryeministri i Kosovës, Albin Kurti, ka zbuluar për një gazetë holandeze detaje në lidhje me organizimin dhe ngritjen nga ana e serbëve të barrikadave në Veri.

Kurti tha se ngritja e barrikadave u orkestrua nga Beogradi, ku njerëzit u sollën me autobusa në veriun e Kosovën për qëllime destabilizuese.

Shefi i qeverisë shtoi gjithashtu se ndër personat e sjellë me autobusë kishte pjestarë të maskuar të Brigadës së Veriut, Grupit Wagner dhe Ujqërit e Natës. Ai nënvizoi se të gjitha provat me foto dhe video janë dokumentuar dhe u janë dërguar organeve ligjzbatuese.

“Njerëzit u sollën me autobusë nga Serbia për të udhëhequr barrikadat. Ne kemi prova se këta janë njerëz të maskuar me shenja të milicisë ruse Wagner, Ujqërit e Natës (një bandë ruse motoçikletash besnike ndaj Putinit) dhe të ashtuquajturës Brigadë e Veriut”, ka thënë Kurti për gazetën holandeze NRC.

Gjithashtu ai shtoi se Prishtina duhet të vendosë sundimin e ligjit në very të Kosovës.

“Ne do të duhet të vendosim sundimin e ligjit në veri të Kosovës për të trajtuar realisht paligjshmërinë atje”, tha Kurti.

Shërbimet e sigurisë boshnjake ua kanë ndaluar hyrjen në Bosnje dhe Hercegovinë gjashtë shtetasve të Serbisë, të cilët janë të lidhur me formacionin paraushtarak rus “Wagner”.

Damnjan Knezheviq, lider i shoqatës “Patrulla e Popullit” në Serbi, anëtarët e kësaj shoqate, Zoran Lekiq dhe Aleksandar Lisov, si dhe pjesëtarët e formacionit paraushtarak Wagner, Aleksandar Milovanoviqit, Zoran Paviqit dhe Dragan Mirkoviqit iu ndalua hyrja në shtetin bosnjak, shkruan istraga.ba.

Të gjithë të lartcekurit janë shpallur persona të rrezikshëm për sigurinë kombëtare dhe u është ndaluar hyrja në Bosnje dhe Hercegovinë që nga fillimi i këtij viti.

Milovanoviq, Paviq dhe Mirkoviq aktualisht ndodhen në Ukrainë, ku po luftojnë në anën e forcave ruse.

Damnjan Knezheviq, Zoran Lekiq dhe Aleksandar Lisov kanë qenë shumë aktivë në veri të Kosovës, të cilët së fundmi kanë vizituar Qendrën Wagner në Rusi.

Zoran Lekiq dhe Aleksandar Lisov, i cili u prezantua në fillim të dhjetorit si ideolog dhe udhëheqës i Qendrës PMC Wagner – Qendra Kulturore dhe Informative Ruso-Serbe e Miqësisë dhe Bashkëpunimit “Orly” në Beograd, gjithashtu shfaqen në videon e Qendrës së Wagnerit.

Kujtojmë se pas vizitës së tij në Qendrën Wagner, Damnjan Knezheviq u bëri thirrje serbëve që të fillojnë çlirimin e Jarinjës në veri të Kosovës.

Më 18 dhjetor të vitit të kaluar, Knezheviq qëndroi në Jarinjë me disa anëtarë të maskuar nga Serbia.

Ndryshe, “Patrulla e Popullit” është organizatë e krahut të djathtë që vitet e fundit ka zhvilluar një fushatë kundër emigrantëve në Serbi.