Suharekë: Mosmarrëveshje për pronë, djali i shkon babait në shtëpi dhe gjuan me armë

Këtë veprim, i dyshuari e ka incizuar dhe e ka postuar në rrjetin social “Snapchat” dhe ua ka dërguar vëllezërve të tij.

Në vendin e ngjarjes, Policia ka gjetur një fishek në automjetin e të dyshuarit dhe më pas e kanë arrestuar atë.

21-vjeçarit i është sekuestruar arma e tipit “Moris by AIAK” e kalibrit 9 milimetra dhe tre fishekë.

Njoftimi i plotë:

Arrestohet një  personi dhe sekuestrohet një pistoletë në Suharekë

Prizren, 15 Janar 2023

Me datë  14  Janar  2023, rreth orës 19:25,  Njësitet policore të Stacionit Policor Suharekë,  bazuar në informacionet e mbledhura, kanë lokalizuar dhe kane arrestuar të dyshuarin  S. A (21 vjeçar), nga i cili është sekuestruar një armë gjithashtu.

I dyshuari i lartshënuar pas një mosmarrëveshje që e kishte pas për pronë me familjen e tij, ka shkuar afër shtëpisë së viktimës (babai i tij) dhe ka shtënë me armë zjarri në ajër,  këtë veprim e ka incizuar  dhe e ka postuar në rrjetin social ,,Snap Chat’’ dhe të njëjtin ua ka dërguar vëllezërve të tij.

Patrullat policore pasi që kanë dalë në vendngjarje, fillimisht e kanë gjetur një fishek në automjetin e të dyshuarit e më pas kanë arritur ta arrestojnë të dyshuarin si dhe e kanë gjetur armën e tipit Moris by AIAK Cal. 9 mm ,  me të cilën i njëjti dyshohet të ketë shtënë në ajër, po ashtu i kanë gjetur edhe tre fishekë të tjerë.

Arma dhe katër fishekë të kalibrit 7.65 janë sekuestruar nga ana e krim teknikut.

Në konsultim me prokurorinë e krimeve të rënda i dyshuari ndalet në mbajtje për  48 (dyzetetetë)  orë.