MSH blen insulina me procedurë emergjente në vlerë mbi 1.8 milion Euro

Ministria e Shëndetësisë përmes një procedure emergjente ka nënshkruar kontratë me kompaninë “Meditech”, për furnizim me insulina analoge me veprim të shpejtë dhe insulina analoge bifazike me veprim të shpejt dhe të mesëm, shkruan Gazeta Shneta.

Kjo kontratatë MSH-së i ka kushtuar 1,818,682 Euro për furnizim me insulina në sasi prej mbi 450 mijë sosh.

Kontrata kornizë do të zgjasë 6 muaj dhe në momentin që hyn në fuqi kontrata e rregullt përmes procedurës së hapur, “kjo kontratë e negociuar ndërpritet automatikisht”, thuhet ndër të tjera në Nenin 1 të kësaj kontrate.

Kujtojmë se procedura e hapur për furnizim me insulina është iniciuar në fund të vitit 2020, por që nga ajo kohë është në procedurë të ankesave në Organin Shqyrtues të Prokurimit Publik.

MSH në këtë procedurë fillimisht e kishte shpallur fituese kompaninë “Pharma Leader”, por ky vendim ishte rishqyrtuar pas ankesës së kompanisë “Meditech”. “Pharma Leader” kishte ofertuar me çmim më të lirë, por nuk kishte Autorizim Marketing, për çka MSH më pas ia dha tenderin kompanisë “Meditech”.

“Pharma Leader” më pas e kishte apeluar vendimin e MSH-së në OSHP dhe kjo e fundit e ka rikthyer në rivlerësim lëndën tre herë, edhe pse MSH në shtator të vitit të kaluar e kishte anuluar në tërësi.

Për vendimin e fundit për rivlerësim nga OSHP, Ministria e Shëndetësisë ka reaguar publikisht duke thënë se me vendimin e gjykatës së tenderëve mund të rrezikohet shëndeti i qytetarëve duke u detyruar të furnizohen me insulina pa certifikatë të cilësisë. MSH kishte njoftuar në këtë reagim se ka ngritur padi ndaj OSHP-së në gjykatë. Për këtë procedurë ende nuk ka një vendim final.