Kongresisti amerikan, Torres: Perëndimi ka shkuar shumë larg me përkëdheljen e Serbisë

Torres tha se Kosova meriton të përkrahet në betejën e saj me Serbinë, duke shtuar se e “shqetëson fakti se Perëndimi ka shkuar shumë larg me përkëdheljen e Serbisë”.

“Kosova meriton njohje, meriton përkrahje në betejën kundër Serbisë e cila është një prokurë ruse dhe ne duhet të mbështesim demokracinë e Kosovës. Me shqetëson fakti se Perëndimi ka shkuar shumë larg me përkëdheljen e Serbisë”, deklaroi Torres për RTV21.
Kongresisti amerikan shtoi se Kosova është aleate e Shteteve të Bashkuara të Amerikës, ndërsa Serbisë ia jepi një tjetër epitet, atë të “dorë e zgjatur e Rusisë”.

“Ne duhet medemos ta pranojmë së Kosova është aleate e SHBA-ve, kurse Serbia është dorë e zgjatur e Rusisë dhe ne duhet të kërkojmë vendosmërisht pranimin e Kosovës së Pavarur si demokraci”, ka thënë ai.

Për Torres, Kosova është një prej shteteve më demokratike në botë. Ai bëri thirrje për njohje të Kosovës si një shtet i tillë.

“Unë shërbej me krenari si kryesues i Komitetit për shqiptarë në Kongresin e SHBA-ve dhe mbaj me nder Rolin e Eliot Engel, kampionit historik të komunitetit shqiptar në Kongresin e SHBA-ve. Para pak muajsh unë isha në Kosovë se bashku me Hari Bajraktarin për të përcjellë mesazhin se SHBA- të qëndrojnë pa mëdyshje me popullin e Kosovës. Kosova është një ndër demokracitë më të fuqishme në botë dhe unë ju bëje thirrje çdo vendi në botë, çdo vendi në NATO dhe çdo vendi në komunitetin ndërkombëtar që ta njeh Kosovën demokratike”.

Kujtojmë se kongresisti Ritchie Torres kishte vizituar Kosovën në nëntor të vitit të kaluar. Ai kishte zhvilluar takime me krerët opozitarë, me ç’rast edhe ka dëshmuar përkrahjen e tij të parezervë ndaj Kosovës.