Java me emrin e Martin Berishajt – Krejt çka u raportua për thellimin e skandalit të ambasadorit

Së fundmi, informacionet janë që kryeministri i Kosovës, Albin Kurti, dhe presidentja e Kosovës, Vjosa Osmani, kanë marrë para nga Martin Berishaj për kampanjat e tyre të fundit elektorale, ka thënë Luka Persh, gazetari nga mediumi online Prava.si.

Në një hulumtim të tij, ai zbuloi se nuk bëhet fjalë mijëra, as për qindra mijëra, por për miliona euro në një skemë të kësaj kompania e cila duke përdorur degët e veta nëpër Ballkan, kryesisht Bosnje dhe Hercegovinë, Serbi dhe Shqipëri, ka shpërlarë para. Brenda skemës dhe si lojtar periferik ishte edhe Martin Berishaj.

Në një pjesë të shkrimit të tij, Persh shkruan se një shumë e caktuar parash nga ato që mori Berishaj, përfunduan në kampanjë elektorale në Kosovë, saktësisht tek Lëvizja Vetëvendosje dhe te Lista Guxo.

E për komunikimin me krerët e shtetit, i pyetur në komision parlamentar të Kosovës, Martin Berishaj gjatë intervistimit para dy muajve kishte deklaruar se asnjë mjet financiar nuk kishte shkuar as te Kurti, as te Osmani e as te Rizvanolli.

‘’ “Jo, nuk kam pasë sepse të gjitha komunikimet me kryeministriat, ministra, janë në mënyrë protokulare të shkruar ashtu siç duhet por as me gojë nuk kemi folë për atë çështje. Ato mjete nuk kanë përfundu as te kryeministri Kurti, as kërkun, nuk janë investuar dhe nuk kanë shkuar”, ishte përgjigja e Martinajt.

Ngrihet kallëzim penal ndaj ambasadorit Martin Berishaj

Hetuesit e Policisë së Kosovës para tre javësh kanë ngritur kallëzim penal kundër ambasadorit të Kosovës në Kroaci, Martin Berishaj.

Kallëzimi penal kundër tij është dorëzuar në Prokurorinë Speciale treguan burime të KOHËS dhe thanë se pas hetimit preliminar të nisur muaj më parë, dyshimet janë që Berishaj ka përfituar së paku 1.5 milionë euro nga kompania GEN me seli në Serbi për periudhën 2019 e deri në prillin e vitit 2022.

Paparaci: Martin Berishaj mori para edhe nga një tjetër kompani serbe

Paparaci ka zbuluar se ambasadori i Kosovës në Kroaci, Martin Berishaj, ka pranuar mijëra euro prej një kompanie energjetike serbe, përveç GEN-it nga Beogradi.

Paratë janë tërhequr nga vetë ambasadori Berishaj përmes kompanisë “MB Consulting” më 2016. Janë plotë 39 mijë e 600 euro.

Martin Berishaj mori para nga biznesmeni i lidhur me biznesmenë dhe politikanë serbë

Lidhjet e tij përfshijnë edhe një biznesmen kosovar kontrovers që është i përfshirë në raporte biznesore me politikan të njohur serb. Bëhet fjalë për Tapi Sadikajn, i cili në takimet me ta ka përmendur edhe njohje të tij me biznesmenë rusë.

Berishaj nuk ka vetëm afërsi shoqërore me të. Por, njëjtë sikurse nga “GEN Beograd”, ambasadori Berishaj ka pranuar para në llogarinë e tij nga ky biznesmen kontravers.

Martin Berishaj humb betejën në Slloveni me gazetarin, Gjykata: S’ka shpifje

Kur gazetari i TV Planet në Slloveni, Vitomir Petroviç, shkroi për përfshirjen e Martin Berishajt në shpëlarje parash, ambasadori i Kosovës në Kroaci e paditi për shpifje në Gjykatën e Qarkut të Lubjanës.

Por, në një përgjigje  për Albanian Post, Gjykata e Qarkut në Slloveni ka treguar se gazetari nuk është dënuar dhe rasti ka “përfunduar pa efekt juridik”.

Kjo nënkupton se shkrimet për Berishajn gjykata nuk i ka cilësuar si shpifje.

Anja Slak, nga Shërbimi për administrimin gjyqësor nga kjo gjykatë, në një përgjigje me shkrim për AP-në, ka treguar detajet e lëndës.

“Në Gjykatën e Qarkut në Lubjanë kemi marrë pyetjen tuaj gazetareske lidhur me lëndën II K 45570/2022. I pandehuri në këtë rast është Vitomir Petroviç, për vepër penale kundër nderit dhe emrit të mirë. Çështja mbyllet pa efekt juridik”, thuhet në përgjigjen e shkurtër nga Slak.

“Shpifja nuk kalon!”, ambasadori Berishaj deklarohet mbi padinë e tij ndaj gazetarit slloven

Martin Berishaj  ka mohuar se padia e tij ndaj gazetarit slloven Vitomir Petroviç, është hedhur poshtë nga Gjykata e Qarkut në Lubjanë.

Sipas tij, kjo gjykatë ende nuk e ka pranuar padinë për shqyrtim për shkak se procedura e ankimimit ende nuk ka përfunduar.

“Për çështjen penale në fjalë është ngritur padia ime private kundër gazetarit slloven i cili me dt 21.04.2022 shpifi kundër meje, por Gjykata e Qarkut në Lubjanë ende nuk e ka pranuar padinë për shqyrtim për shkak se procedura e ankimimit ende nuk ka përfunduar”, shkroi Berishaj në Facebook.

Ekskluzive: Martin Berishaj, bashkëpronar edhe në kompaninë milionëshe që organizonte lojëra të fatit në Shqipëri

Martin Berishaj, ambasadori i Kosovës në Kroaci, i dyshuar në përfshirjen e mega-skandalit ‘GEN Beograd’ ose afera më e dyshimtë energjetike në vendin tonë, figuron të jetë aksionar edhe në një kompani të majme në Shqipëri, qarkullimi i së cilës ndër vite, është miliona euro. Aktiviteti i parë i kompanisë, i përshkruar në dokumentet më poshtë, është ‘organizimi i llotarive dhe lojërave të fatit’. Hisen në këtë kompani, ambasadori i Kosovës në Kroaci, z. Martin Berishaj nuk e ka të deklaruar në Agjencinë Anti- Korrupsion.

Periskopi ka gjetur dhjetëra-qindra dokumente, të një kompanie me emrin ‘Nacional Sha’, me qarkullim milionësh, ku në mesin e pronarëve që figurojnë, është edhe emri i ambasadorit Martin Berishaj, i dyshuari në përfshirjen e skandalit të madh të GEN-it serb.

Sipas dokumenteve, z.Martin Berishaj, është hisedar me 10 % të aksioneve në firmën Nacional (Shqipëri), ku në fillimet e saj, ishin katër firma aksionare të tjera: ‘Stil’, ‘Cetis’, ‘Nirvana’ dhe ‘Lucrum’, me pronarë sllovenë e kroatë.

Këshilltar në GEN, u kap me mediat, luajti bamirësin: Krejt çka dëgjuam para dy muajve nga Berishaj në komision

Berishaj fillimisht mohoi skandalin, duke e quajtur shpifje, pastaj pak u mor me media e gazetarë që raportuan, e pranoi se ishte këshilltar në kompaninë GEN, e madje tentoi të kallëxohet bamirës si dhe na bëri me dije se i pengoi termi ‘sekser’.

Mediat sllovene, në fillimvit kishin raportuar se ambasador Martin Berishaj dyshohet se i ka bartur 600 mijë euro para kesh nga kompania e tij në Mal të Zi, tek politikani slloven, Robert Golob. Sipas tyre, në xhirollogarinë MB Consulting, pronar i së cilës figuronte  Berishaj, i ishin derdhur nga një kompani serbe, në baza të rregullta prej 5 mijë deri në 50 mijë euro, për çdo muaj./PERISKOPI/