Suedia zbulon rrjedhjen e katërt në gazsjellësin rus Nord Stream 2

Suedia ka gjetur një tjetër rrjedhje në gazsjellësin rus, duke u bërë i katërti me radhë që zbulohet brenda kësaj jave.

Danimarka dhe Suedia raportuan para disa ditësh për rrjedhje të gazit në gazsjellësat Nord Stream 1 dhe 2, duke alarmuar autoritetet për mundësi të një sulmi të qëllimshëm nga Rusia.

Madje, BE tha se këto rrjedhje ishin shkak i sabotazhit rus.

Mirëpo, Rusia mohoi këto pretendime dhe i quajti si ‘të parashikueshme dhe absurde’.

Roja bregdetare suedeze njofton se ka gjetur rrjedhjen e katërt në Nord Stream 2, shumë afër rrjedhjes së madhe të gjetur më herët në gazsjellësin Nord Stream 1, shkruan BBC, transmeton Klankosova.tv.

Më parë, BE ka akuzuar Rusinë për shfrytëzimin e furnizimit të gazit si armë kundër Perëndimit, për shkak të përkrahjes së tij për Ukrainën.

Kurse, Norvegjia tha se do të vendosë ushtrinë e saj që të mbrojë instalimet e gazit dhe naftës.

Ndonëse, asnjë nga gazsjellësit nuk po transporton gaz momentalisht, edhe pse të dy ata janë të furnizuar me gaz.

Nord Stream 1 shtrihet në hapësirë prej 1200 km nën Detin Baltik nga bregu rus afër Shën Petersburg-ut deri në verilindje të Gjermanisë. Kurse, gazsjellësi tjetër Nord Stream 2, ka ndaluar transportimin e gazit pasi filloi agresioni rus në Ukrainë në muajin shkurt.

Mirëpo, seizmologët raportuan për shpërthime nëndetare para se të ndodhin rrjedhjet. Komanda daneze e mbrojtjes ka publikuar pamje të rrjedhjeve që shkaktuan fluska mbi Detin Baltik, ku më e madhja kishte diametër prej 1 km.

“S’ka asnjë dyshim që këto ishin shpërthime”, tha Bjorn Lund nga Qendra Kombëtare e Seizmologjisë në Suedi.