Eurodeputeti: BE t’i bëjë thirrje vendeve anëtare që nuk kanë njohur Kosovën të ndryshojnë qëndrim

Mandl theksoi se dialogu duhet të ketë rezultate të qarta, njohje reciproke. “Kosova ka pritur shumë kohë që të ketë rezultate në dialog”.

Publikimin e ‘non paper’, lidhur me kornizën e re të dialogut, ai e ka quajtur teori konspirative dhe agjendë sekrete.

Mandl, ka folur edhe për integrimin e Ballkanit Perëndimor në Bashkimin Evropian, si dhe rritjen e dezinformimit rus pas agresionit në Ukrainë.

“E gjithë Evropa është sulmuar që nga 24 shkurti dhe jo vetëm Evropa por e gjithë bota. Bashkimi Evropian ka shumë për të bërë posaçërisht t’u bëjë thirrje vendeve anëtare të cilat ende nuk e kanë njohur Republikën e Kosovës që të kontribuojnë në vlerat evropiane për vendet e Ballkanit Perëndimor”, u shpreh ai në një intervistë për Telegrafin

Po ashtu ka folur për liberalizimin e vizave për qytetarët e Kosovës.

“Unë pothuajse kam humbur durimin dhe e vlerësoj durimin që kanë shumë njerëz në Kosovë sepse është stërzgjatur kjo çështje. Liberlizimin e vizave e meritojnë populli i Kosovës. Kosova i ka përmbushur të gjitha kriteret”.

I pyetur nëse do të ketë liberalizim të vizave në 2023-ën, Mandl tha se nëse do të kisha ndonjë dëshirë, ajo do të ishte që kjo të ndodhte edhe më herët.

Sa i përket Ballkanit të Hapur, Mandl tha se Austria mbështet çdo gjë kur plotësohen kriteret e që kanë të bëjnë me zhvillim të mirëfilltë biznesesh dhe marrëdhënie të mirëfillta ekonomike ku do të ketë gjithëpërfshirje, krijim vendesh të reja pune, rinia të ketë mundësi të mira për të ardhmen e tyre, e kjo do të vlerësohej shumë.