Trusti-i rikuperon humbjet e mëdha

Në fund të muajit shkurt, zyrtarë të Fondit të Kursimeve Pensionale të Kosovës patën konfirmuar se si pasojë e kësaj krize në tregjet ndërkombëtare financiare, Trusti ka pësuar rënie prej afro 100 milionë eurove.

Gjithsej 90 milionë euro ishte shuma që Trusti lajmëroi se ka humbur nga investimet në tregjet e jashtme, vetëm në 7 ditët e para të fillimit të luftës mes Rusisë dhe Ukrainës. Pastaj pati ngritje përsëri dhe një rënie më të ngadaltë.

Mirëpo, sipas të dhënave më të fundit nga tregjet e jashtme, shihet se ka pasur një përmirësim pozitiv të kthimit nga investimet.

Fiks 2,402,314,108 është shuma që Trusti e ka raportuar që e ka nën menaxhim nga data 22 gusht 2022, sipas grafikonit të saj të publikuar, raporton Periskopi.

Më 25 shkurt, mjetet nën menaxhim kanë qenë 2, 286, 571, 013 euro, kohë kjo ku ishte raportuar për rreth 90 milionë humbje. Pra bazuar në të dhënat e asaj date, tash janë plus 116 milionë euro në fond.

Trust e kishte mbyllur vitin 2021 me një shumë prej 2,353,174,911 euro nën menaxhim.

Kujtojmë se deputetë të Partisë Demokratike të Kosovës patën dërguar në Kuvend nismën për ndryshimin e Ligjit për Trusti-në që do t’ua mundësonte qytetarëve të tërheqin 30 për qind të kursimeve të tyre, në mënyrë që t’i bëjnë ballë inflacionit. Por, më 23 qershor, Projektligji për tërheqjen e mjeteve nga Trusti, nuk kishte kaluar në Kuvend me 57 votat kundër të deputetëve në pushtet. Tash, ka rreth një muaj që një peticion për Trustin u dorëzua në Kuvend.

Mbi 21 mijë nënshkrime të qytetarëve u mblodhën në qytete të ndryshme nga organizatorët e këtij peticioni.

Por pavarësisht kësaj, vullneti i qytetarëve është proceduar akoma në Kuvend.

Fondi i Kursimeve Pensionale ka mbi 700 mijë kontributpagues. Rreth 80 për qind e mjeteve janë të investuara në tregjet financiare ndërkombëtare dhe rreth 22 për qind në Kosovë./PERISKOPI/