Escobar në ‘darkë pune’ do të takohet edhe më opozitarët Krasniqi, Abdixhiku e Haradinaj

Vizita e zyrtarëve të lartë evropian dhe amerikan, sipas të gjitha gjasave, realizohet gjatë kësaj jave, dhe vjen pas dështimit të bisedave të javës së kaluar në nivel të kryeministrit të Kosovës dhe presidentit Serb ku palët nuk ia dolën të dakrodohen në lidhje me zgjidhjen e cila do evitonte eskalimin e situatës në veri në fund të këtij muaji.

Emisari amerikan i ngarkuar me çështje të Ballkanit Perendimor, Gabriel Escobar, në vizitën e tij në Prishtinë, do të takojë edhe përfaqësuesit politikë opozitarë të Kosovës. Escobar në Prishtinë vjen së bashku me emisarin fascilitues të BE-së për Dialogun Kosovë-Serbi, Miroslav Lajcak.

Takimi i Escobar me opozitarët kosovarë do të zhvillohet në rezidencën e ambasadorit amerikan, Jeff Hovenier, si darkë pune.

Ftesa për këtë darkë që do të zhvillohet në rezidencën e ambasadorit amerikan në Prishtinë, u ka shkuar tashmë të tre liderëve opozitarë.

Siç merret vesh, Lajҫak dhe Escobar do mëtojnë përafrimin e qëndrimeve të palëve në mënyrë që zgjidhja të gjendet më së largu me 31 gusht.

Ishte menduar që këtë javë në Bruksel të takohen kryenegociatorët nga Kosova dhe Serbia në mënyrë që të vazhdohen bisedat në lidhje me zbatimin e vendimit të qeverisë së Kosovës sa i përket lëshimit të dokumenteve hyrëse dhe dalëse për shtetasit serb si dhe targave të automjeteve, por duket se ky takim do realizohet vetëm pas vizitës së Lajҫakut dhe Escobarit në kryeqytetin kosovar dhe atë serb dhe do varet nga suksesi që këta dy do e arrijnë gjatë bisedave me palët. /Periskopi/